بَـرْنُــوصْ الاحــلامْ

حكاية اليوم فيها برشة انهجة و زناقي إن شاء الله ما يهزّنيش الحديث لزنقة و نريح و ما نعرفش نرجع و إلاّ لزنقة حادّة / على ذكر الزنقة الحادّة زميلة ليّ قالتلي" أوو لالا شمعناها زنقة حادّة " جيت باش نهزّها ندخّلها في زنقة حادّة و من بعد قلت لا يجعلني جرّة تمشيش تزيد تطلّعلي الدمّ لراسي نلصّقها في حيط مالحيوط / هذه الزّنقة الاوّلة أما هاني خرجت منها فيسع . المهمّ ، اليوم أوّل نهار في الأسبوع المغلق متاع الامتحانات / مانيش مهضّمة مغلق هذه إلّي يسمع يفزع تقولش عليهم باش يعملولهم تربّص في منتجع في سويسرا و إلاّ معسكر تدريب في طورا بورا و هي الحكاية الكلّ كلمتين عمِيّ نرفعو بيهم في شويّة جهلوت / الزنقة الثانية . راني عارفتها جمعة كُرْفِي عَسَّة و تصليح و عْصَبْ عاد في هاك الدُّرَرْ إلّي باش ينوّرولي أيّامي و لياليَّ و أنا فادَّة خُلقِي ، أيا قلت خلّي ناخذ دْوَايَ باش ننجِّمْ نقاوم و الدّوَا عندي موش من سبيسيريّة على خاطر الطُبَّة كان يقعدو على حدِّي أنا راهم فلسو . أنا كي تظلام الدّنيا في عينيَّ و الموطورات الكلّ تتعطّل ندخل للحنينة ، للمدينة العربي نشلّل عينيَّ بالبيبان و الحْلِقْ و المسامر و الزّهازات الكَذَّالْ و ننظّف رواريَّ بريحة المدفونة جايبها الهوا حاشمة تتلَوّى من شبّاك مقصورة و نعطي وذني للهادي الجويني صوت فينو يجَنّح بيك من غير ما ينقبلك طنبور وذنك و نعمل مشية و جَيَّة في نهج جامع الزّيتونة النّهج الوحيد الّي ما نغزرش فين نحطّ ساقيَّ كي نمشي فيه حواسِّي كلّها تتعلّق في دبابز العطر و الحنّة و الندّ و السّكنجبير و العفص و الوشق و خناجر اللّوح المعلّقة و الكتب الصّفرا القديمة و أنا حافظة بقايع السّلع الكلّ لكن ما نجّمش نتعدّى و ما نراهمش عندي أنا لا كيفهم بازارات و لا معارض . هذيكة كانت ثنيّتي في سنين الإدمان على المكتبة الوطنيّة في مقرّها القديم نتعدّى في القايلة و عقاب العشيّة و في الصباح بكري صيف و شتا ساعات عامرة و زحمة و ساعات فارغة ظلام و كان ديما عندي هاجس إلّي باش يعرضني في دورة مالدّورات ورا عُرْصَة مالعْرُصْ راجل يلفّني في برنوصُه و يرجع بيَّ لعوام أربعين و خمسين يتحَلّ عليَّ البرنوصْ نلقى روحي قدّام الرّشيديّة في حفلة من حفلات خميّس ترنان نتفرّج و نْـتِمّ هابطة للبْيَاسَة نخلط على عقاب حديث بين كَرَبَاكَة و الهادي العبيدي لكن الشُّوشَة الّي قدّام قهوة تحت السُّور ما تخلّينيش نسمع بقيّة الحديث نتلفّت للخوضة نلقاها شافية رشدي كسّرت عود على راس واحد مالعَوَّادجِيَّ متاعها و العَركَة تفيَّقني نهزّ راسي نلقى البرانص معلّقين في حوانتهم كالعادة نكمّل ثنيّتي و ندخل للمكتبة و ندفن راسي في كتاب ./ الزّنقة الثالثة ههه شعرة لا مشيت و ما رجعتش منها ./ اليوم و أنا في القسم نراقب سألني تلميذ " مَدَامْ ، جامع الزّيتون فيه صُمعَة ؟ " أيْ زيتون ههههه جيت باش نقلّه لا حاشا و كلاّ فيه بِيسْتْ متاع شطيحْ و من بعد قلت زايد هوما ضايعين خُـلقَة بعد الّي محمّد الخامس وَلاّتْ منطقة من مناطق الجمهوريّة تتميّز بعاداتها و تقاليدها هههههههه كانش تقاليد القزوردي ، و قالّك رأيتُ تمثال إمام يضعُ صندوقا في حِجْرِهِ فقالوا لي هذا ابن خلدون ههههه شفتو ثقافة الصنادق شتعمل ؟

اليوم كي عملت دورة في البلاد العربي حسّيت بغربة غربة بالحقّ نْـصُبْ الزّقوقو و قراطس الدُّنيا و الشقايل بجنب الكتب ، البلاستيك غمّ الالوان و النقيشة ، التوانسة توَسّخُـو في منطقهم و في هَـيِّـتهم و ديما يجريوْ و يشْرِيوْ ، العباد متخمّرَة يقضيوْ بهاليدْ و هَاليِدْ ما فيبالهم بحتّى شيْ لا أزمة اقتصاديّة عالميّة و لا ولادهم الّي شوف و شوف ينجحو والا لا و كان نجحو وقتاش باش يخدمو و كي يخدمو وين باش يُوصلو بخدمتهم ... النّاس مازالت تِترِسْ بالقفاف و كي تجي تكلّمهم يقلّك " آش باش نعملو سنّة الحياة " سُنَّة الحياة ؟ سُنّة شكون و وين ترَاوْ فيها الحياة ؟ عند الّي يسمع في عذاب القبر و حَاطِطْ مُخّ راسُه بالبكا و يترهدن ؟ سُنّة الحياة كي ماعادش تحلّ كتاب تقراه ؟ سُنّة الحياة كي تعدّي العشيّة في القهوة و ولدك الّي مازال تلميذ يشمّ في الكول تحت حيط ؟ سُنّة الحياة كي بنتك تلبس الجديد و الغالي و ما تسألهاش منين جابت حَقُّه ؟ سُنّة الحياة ؟؟؟ سُنّة الحياة قالت لك اتسَلِّفْ حقّ الكبش الّي باش تذبحو في العيد على عينين النّاس ؟ سُنّة الحياة ما تطُلّش على والديك على خاطرهم مرضى و كبار و ما عندك ما تصَوِّرْ منهم ؟ سنّة الحياة كي ولدك يقلّك أنت ما تصلّيش و طاعتك ماهاش واجبة عليَّ ؟ ههههه سُنّة الحياة ... زيدو اجْرِيوْ و كلّ عيد اقطعُو يدين الحَزَّازَة و امْلاَوْ طواولكم بالكريدي و رُدُّو بالكُم تحلّو كتاب والا تسمعو غناية نظيفة .
آآآآآآآآآآآه وينك يا برنوص أحلامي .