كُـسْــكْـسِـي البلوغسفـار

يحكيو على زوز رجال صحاب واحد تونسي و لاخر أندلسي جيران في السّوق حوانتهم مقابلة بعضها . نهار مالنّهارات التونسي استدعى الاندلسي للفطور في داره ، سكّرو حوانتهم و قصدو ربّي ، قعدو باش يفطرو هكّاكة و مرت التونسي جاية تكالي في قصعة كسكسي قدّ الماهي عليها يجي زوز كيلو لحم ، كعبة البطاطا على حالها ، أيا فطرو واستحمدو ربّي .

بعد بمدّة الاندلسي حبّ يرجّع الضّيافة لصاحبه التونسي قالّه يا عشيري أنت كنت كريم معايا و دخّلتني لدارك و ذوّقتني من زادك و ما دوا الملاحة كان الملاحة غدوة الحيّ الفطور عندي في الدّار . التونسي خمّم و قاس قال في قلبه صاحبي حاله ضعيف مازال كي جا من الاندلس هارب بالرّوح خلّى حاله و ماله غادي و يزيد يضعضع روحه بضيافة ؟ لكن ما نجّمش نحشّمه يلزمني نقبل . من غدوة كان التونسي في دار الاندلسي و تمدّت قدّامهم طاولة نودّكم و لا نشهّيكم هي نواصر هو طاجين سبناخ هي عين السبنيورة هوما صوابع العلجيّة هي سلايط هو بريك ؟ الحاصل هاك التونسي قعد حالل فمّه في التصنيف و النّظام و الذّوق في حطّان الطاولة ، دار لصاحبه قالّه " بلاّزمة إلاّما نطلّق المرا ظهرت ما تعرفش تطيّب ملّي خذيتها يا كسكسي يا مرقة بطاطا " ضحك الاندلسي و قالّه " لا لا يا راجل يكون منّك العقل ، ما عليهاش ملام هكّاكة ستانست عند والديها تتحطّ حاجة وحدة على سفرة الطّعام ، في عوض تطلّقها جيبها للمرا عندي توّة تعلّمها كيفاش تصنّف عمارة طاولة برطل لحم " و كان العمل هكّاكة

يظهرلي أحنا التوانسة قعدت سابغة فينا حكاية ما نحطّو قدّامنا كان حاجة لطخة وحدة و البلوغسفير صورة مصغّرة ديما عندنا موضوع واحد يلزم النّاس الكلّ تقطع فيه يدين الحزّازة مرّة الحوض المنجمي و مرّة غزّة و توّة القرضاوي عاد و كلّ واحد يولّي يفهم أكثر من غيره و هو بركة إلّي الشريف و النّاس الكلّ عملاء و تتحلّ سوق الاتّهامات و من بعد يبرد الموضوع هذاك و ننساوه و ندورو على حوارينا و نبداو نفركسو على شنعة أخرى باش نكبّشو فيها كلّنا، المهمّ كي تدخل للبلوغسفار ما تلقى كان قصعة الكسكسي في كلّ دار