vendredi 13 mars 2009

كُـسْــكْـسِـي البلوغسفـار

يحكيو على زوز رجال صحاب واحد تونسي و لاخر أندلسي جيران في السّوق حوانتهم مقابلة بعضها . نهار مالنّهارات التونسي استدعى الاندلسي للفطور في داره ، سكّرو حوانتهم و قصدو ربّي ، قعدو باش يفطرو هكّاكة و مرت التونسي جاية تكالي في قصعة كسكسي قدّ الماهي عليها يجي زوز كيلو لحم ، كعبة البطاطا على حالها ، أيا فطرو واستحمدو ربّي .
بعد بمدّة الاندلسي حبّ يرجّع الضّيافة لصاحبه التونسي قالّه يا عشيري أنت كنت كريم معايا و دخّلتني لدارك و ذوّقتني من زادك و ما دوا الملاحة كان الملاحة غدوة الحيّ الفطور عندي في الدّار . التونسي خمّم و قاس قال في قلبه صاحبي حاله ضعيف مازال كي جا من الاندلس هارب بالرّوح خلّى حاله و ماله غادي و يزيد يضعضع روحه بضيافة ؟ لكن ما نجّمش نحشّمه يلزمني نقبل . من غدوة كان التونسي في دار الاندلسي و تمدّت قدّامهم طاولة نودّكم و لا نشهّيكم هي نواصر هو طاجين سبناخ هي عين السبنيورة هوما صوابع العلجيّة هي سلايط هو بريك ؟ الحاصل هاك التونسي قعد حالل فمّه في التصنيف و النّظام و الذّوق في حطّان الطاولة ، دار لصاحبه قالّه " بلاّزمة إلاّما نطلّق المرا ظهرت ما تعرفش تطيّب ملّي خذيتها يا كسكسي يا مرقة بطاطا " ضحك الاندلسي و قالّه " لا لا يا راجل يكون منّك العقل ، ما عليهاش ملام هكّاكة ستانست عند والديها تتحطّ حاجة وحدة على سفرة الطّعام ، في عوض تطلّقها جيبها للمرا عندي توّة تعلّمها كيفاش تصنّف عمارة طاولة برطل لحم " و كان العمل هكّاكة
يظهرلي أحنا التوانسة قعدت سابغة فينا حكاية ما نحطّو قدّامنا كان حاجة لطخة وحدة و البلوغسفير صورة مصغّرة ديما عندنا موضوع واحد يلزم النّاس الكلّ تقطع فيه يدين الحزّازة مرّة الحوض المنجمي و مرّة غزّة و توّة القرضاوي عاد و كلّ واحد يولّي يفهم أكثر من غيره و هو بركة إلّي الشريف و النّاس الكلّ عملاء و تتحلّ سوق الاتّهامات و من بعد يبرد الموضوع هذاك و ننساوه و ندورو على حوارينا و نبداو نفركسو على شنعة أخرى باش نكبّشو فيها كلّنا، المهمّ كي تدخل للبلوغسفار ما تلقى كان قصعة الكسكسي في كلّ دار

16 commentaires:

chanfara a dit…

:))))))))))

وحدك يا ولاّدة

WALLADA a dit…

شكرا شنفرى

Anonyme a dit…

Ouf sauvé :)))), je porte un nom andalou :)))
PS : Avant l'arrivée des mauresques, les autochtones ne connaissaient pas la culture des pommes de terre.

آش كان عليه a dit…

ياولادة وليت ممحون بيك.وحدك الحميلو.نسيتنا في بيغ تراب بوي.

WALLADA a dit…

آش كان عليه

الله لا يمحنك و مرحبا بيك و البيغ صديقنا راهو و مانيش حمل منافسته ههههه

الحلاج الكافي a dit…

معناها مرت الأندلسي ولّت تطيب كي التونسية ماكلة واحدة ومسوسة وزيد في لخر عركة

bent 3ayla a dit…

زايد معاك كي "تطبخها" تجيبها قد قد

kacem a dit…

من الناس المسؤولين على ها الطاولة ، هي سيادتك يا ولاّدة ...و لذلك ما ظنيتش بالي إنت قادرة على طبخة صحيحة ! و الرّبيع من باب الدّار إبان ...تدّخلك الغير برئ في توجيه البلوقسفار عبر عبّر إنها تونس كان واضح و ما نجمتش روحك !
و للحديث بقيّة

brastos a dit…

اهم ما في التدوينه : "طاجين" سبناخ
هههههههه

WALLADA a dit…

الحلاّج

نزيدو شويّة افّاح توّة العرك ينقص هههه

ينت عايلة

تعلّم التطيب باش ما تفضحناش هههه

قاسم

تدخّلي غير البرئ في توجيه البلوغسفار ؟ هاني ولّيت مهمّة و أنا ما في باليش
ما نجّمتش روحي هذا موش أنت الّي تقرّره
و مرحبا بيك في كلّ وقت


براستوس الفنّان

نضمنلك طاجين سبناخ في كلّ تدوينة نكتبها على التصنيف على شرط ما تبخلش علينا بتصاور باهيين ما كانش ندوّرها مقرونة كذّابة راني هههههه

Anonyme a dit…

زعمة شنوا اللطخة و الشنعة الجاية ’؟؟؟؟؟؟

Adem Salhi a dit…

و الله ما فهمتش شنوةالغالط في الحكاية؛ طبيعي انو البلوقسفير تكون مرتبطة بشنوة يصير في المكان او الزمان؛ كي ايولي ثمة حاجة صايرة في البلاد طبيعي انو الناس تحكي عليها؛ او مبعد يتبدل الموضوع؛ آخي هذي في البلايص الكل؛ جرايد الاسبوع هذا تتناول نفس المواضيع؛ الاخبار في التلفزة هي بيدها في القنوات الكل؛ لانهم يحكوا على نفس الأحداث؛ لذا من الطبيعي انو التفاعل متاع المدونين ايكون مع شنوة يصير في العالم او في البلاد؛ او ما عدا ذلك اهوكا كل واحد يحكي في حكاية؛ ولا تحب المدونات تكون خارج اطارها الزماني او المكاني؛ مثلا الجمعة اللي فاتت تحبهم يحكو على ارتفاع منسوب المياه في المحيط المتجمد الجنوبي؟؟؟

WALLADA a dit…

آدم

طبيعي أنّنا نتفاعلو مع موضوع السّاعة و نكتبو فيه أما إلّي موش طبيعي أنّنا نستغلّو كلّ موضوع باش نعمّقو هوّة الخلاف الّي بيننا و البعض كيما ترى يوظّف الموضوع هذاك باش يخوّن غيرو و يخرّجو يا رجعي يا عميل
معناها في عوض مواضيع السّاعة تكون فرصة للنّقاش تولّي مناسبة لخصام جديد
هذا الّي قصدته

Hanou.Fm a dit…

ولادة صدقني ما ندخل ليلبلوغسفير لما نطل عليك..ماشاء الله عليك..ايا للا هاي عطلة كاملة قدامك امتعينا بالجديد..وقداش تمنيتك استاذتي مع اني شاكه فيك..اسلوبك يذكرني باستاذة نحبها اما ما نتصورهاش على دراية بالتكنولوجيا الحديثة..

Anonyme a dit…

ندعو لأندلس إن حوصرت حلب.... أو قيروان....!

لزوم مالا يلزم هو الرّياضة اليوميّة لجمهور عريض من مدوّنينا....

Unknown a dit…

الكسكي أنواع (محدودة صحيح لكن متنوّعة) فماّ الكسكسي بالدّجاج و لا العلوش و لا البقري...فماّ شكون ما يحبّوش بالحوت و يحبّو باللّحمو فمّا شكون ما يحبّوش بالخضراء...و فمّا اللّي ما يحبش الكسكسي جملا
و هو برشا برشا موش باهي

البوقا تهضم