في وداع ولاّدة

توّا عندي مديدة ما كتبتش حاجة نرضى عليها / ما عدا قصيدة والا ثنين / مِلّي بدات حرب داحس و الغبراء في البلوغسفار، تراجع الإبداع و ذبلت الكلمة الحُرَّة لحساب السبّانْ و الكلام الموذي . ما نخبّيش عليكم طارت النفحة و تردّدت أكثر من مرّة إنّي نسكّر الحانوت و نكتب في بلاصة أخرى و إلاّ نبدّل القلم فرد مرّة .
تعرفو هاك الّي كي يجي خارج من داره يبدا يتمرخى و يتسبّب باش يزيد يقعد شويّة و كيف يوصل للباب يتلفّت و يعمل نظرة أخيرة للسقف و الحيوط ، و يرى في كلّ تركينة ذكرى و حكاية ؟ أنا هكّاكة اليوم ، سكّرت الفايسبوك و صنادق البريد الالكتروني و حلّيت مدوّنتي و رجعت لأفريل 2008 لبداياتي ، قرابة 300 تدوينة خلاف الي شاركت بيهم في المدوّنات الجماعيّة لخرين .
شفتو هاك الّي يحلّ ألبوم تصاوره بالأبيض و الأسود و يغطس فيم حتّى يضيّع الزمان و المكان ؟ أنا هكّاكة جرالي ، رجعت للانطلاقة و بديت نتصفّح بالتدوينة و نقرى في التعليقات / الوالدة قالت لي إلّي هي نادات عليّ ثلاثة مرّات و ما سمعتهاش / عالم آخر لقيت روحي فيه : مقالات ، شعر / هههه أنا نكتب في الشعر؟ و بالدّارجة ؟ / دراسات ، تفدليك ، عرك ، رمضان ، أعياد ، تهاني ، حملات تضامن ، أحزان ، وقفات غضب ، خلافات ، مواساة ... كلّه عشناه مع بعضنا
كنت كأنّي نتفرّج على وحدة اخرى ما نعرفهاش ، شيء مذهل أنّك تشوف روحك من برّا ، عينك تولّي ترى أوضح و نقدك لنفسك يولّي أكثر موضوعيّة كيف ترجع للّي كتبته و بينك و بينه مسافة الزمان . فمّة قولة للتوحيدي في المجال هذا تعجبني برشة ، كان يقول : " من اشدّ عيوب الفرد ، خفاء عيوبه عليه فمن لا يرى عيبه لا يرى محاسن غيره فلا هو مُدركٌ محاسن غيره و لا هو مُقلِعٌ عن عيبه الذي لا يراه " . في الحقيقة عزّ عليّ الّي قريته الكلّ و الصداقات الّي تكوّنت و تشابكت طول هالوقت و ما هانش بيّ نقضي على ولادة في لحظة فتور .