samedi 6 février 2010

إحجبْ كما تشاء فكلّ المدوّنات بيوتنا

ما نيش مستغربة من حملات الحجب المتعاقبة توّا عامين على خيرة المدوّنات بداية من سمسوم ، أبو ناظم ، براستوس ، سفيان شورابي ، أرابيكا ، كلندو ، عمروش و أخيرا طارق الكحلاوي و فيهم شكون الّي مدوّنته تعرّضت للحجب أكثر من مرّة ... موش مستغرب على خاطرهم ناس كتبو في الصّميم لا في الطّقس لا في الموضة

كذالك مانيش مستغربة من حملات التضامن الّي يعملوها المدوّنين مع كلّ مدوّنة محجوبة و هذا تصرّف طبيعي صادر من ناس آمنوا بحريّة مسؤولة لتعبير ناضج. و هذا الّي يلزمنا نعملوه إذا نحبّو استمرار هالفضاء الّي طول حياته ملّي تبعث و هو قايم على الحوار و الاختلاف يهدى ساعات و يشعل ساعات و لكن حتّى واحد فينا ما سعى أو حتّى فكّر في ضرورة حجب مدوّنة غيره لأنّه ما يتّفقش معاه. اليوم أصبح ضروري أنّ مدوّناتنا تتفتح على بعضها لأنّ في إسكات واحد منّا إسكات لينا الكلّ

هذا الكلّ مانيش مستغربة منه ، الشيء الوحيد الّي مستغربة له هو كيفاش القوّاد ينجّم يجيه نوم اللّيل و يحطّ راسه عالمخدّة و يرقد كيف خلق ربّي الكلّ

غريبة

7 commentaires:

abunadem a dit…

http://scribbles12.blogspot.com/2010/02/blog-post.html

kacem a dit…

ما تنسيش بالي قاسم مصنصر و على المدونة هذه

عبر أنها تونس

كذلك !!! يعني ....ما وفاتش الحكاية و ماهيش باش توفى !!!

ما إتشوفيش بالي ثمة شوية تناقض !!!

H.B.J a dit…
Ce commentaire a été supprimé par un administrateur du blog.
Anonyme a dit…

t'es trop débile H B J

Anonyme a dit…

باهي الشــّلبوق لي كليتو يا حميداتو ؟؟

Qalam Ahmar a dit…

والله شي يغم عالقلب ويقطع الشاهية على الإنتاج البلوغوسفاري .. يعني بالرغم إلي نختلف في الراي مع طارق في برشة مواضيع إلا أنو المخلوق هذاكة نحب نقرالو .. تلاحظ في تدويناتو الكل جهد و جدية و محاولة دايمة لابراز الراي المخالف نوع من بحث عن موضوعية في الطرح

إنسان لطيف و محترم و متثقف و متعلم .. و حسب رايي هو واحد من المدونين التونسيين البارزين و المؤثرين و المؤثثين للبلوغوسفار التونسية

فما حاجة ما يعرفهاش طارق هي أني العبدو لله جيت للبلوغوسبوط تقريبا بفضلو .. أنا كنت اندوّن على ياهو 360 مع مجموعة مالأصحاب من 2006 تقريب و لما تسكّر الـ 360 تشتتنا و نهار صديقة أمريكية تعيش في تونس كنا ديما نتجادلو بيناتنا (فيما يخص المواضيع السياسية و هموم تونس) بعثتلي الرابط المدونتو و نصحتني بيها

ليّة شهور إذا موش سنين نتابع في تدويناتو و من خلال التعليقات على صفحتو تعرفت على مدونتك يا ولادة و على تونبلوغ

شي يحشّم كيفاش تونس تعامل في ولادها إلي يحاولو يجعلو من الأنترنات التونسية حاجة أرفع من "محلاك مابن عينيك" و LOL و MDR و FarmVille

سامحني طولت التعليق .. توّا علمت بهالخبير على مدوّنتك .. نشالله نرجع بعد سويعات اب تدوينة مساندة و احتجاج و استنكار و هو اضعف الإيمان

WALLADA a dit…

لحمر

سعيدة جدّا بتعليقك و تضامنك

مرحبا بك قارئا و مدوّنا و صديقا