jeudi 11 février 2010

مستحيلات ... مستحيلات



قال أحد النبّارين

ما يمشيش في بالكم إلّي العالم فيه عجايب الدّنيا السّبعة أكاهو ، فمّة الدّوبل متاعهم : مستحيلات الدّنيا الارعطاش . شدّو عندكم
مستحيل تلقى
إماراتي فقير - مصري ساكت - كويتي ما عندوش سيّارة - سعودي ناشط - ليبي موش لابس بالأخضر - سوداني أبيض - يمني صاحي - إيراني إسمه عمر - باكستاني نظيف - لبناني ما يتفلسفش - فلسطيني موش لاجئ - مغربي ما يشربش التاي - جزايري دمّه بارد - تونسي ما يخدّمش مخّه

فأجاب صبايحي عمّار و كان مولعا بالتقليد و حشر أنفه في أيّ موضوع و لا يفوّت فرصة كي يتفشخر

قال

حتّى أحنا عندنا المستحيلات بفضل الجهود المبذولة و المثابرة المتواصلة صرنا و الحمد لله في مرتبة مرموقة في مصافّ الأمم المحرزة على مستحيلات 2010
شدّو عندكم



مستحيل تلقى عندنا


مدوّنة يتكلّم مولاها في حاجة ما تعجبش و ما يلعبش بيها المقصّ
مدوّن يحبّ عَرفي عمّار قدّ ماهو المسكين حسّاس و رومنطيقي و يحبّ الفراشات و فُـمْ ما يخرّج عيب



قاطعه أحد النبّارين و هو يتميّز غيظا


توّا هذم مستحيلات داخل بيهم و تزاحم و تدزّ في صدرك و عامل فيها بطل ؟

فأجاب صبايحي عمّار بنبرة يائسة: تي أنا في هذم و نشا الله نقدّ روحي ، موش عيب إنّك تبذل مجهود باش تحسّن مستوى معيشتك ، موش مهمّ الطريقة المهمّ النتيجة ، ماهو عَرفي راضي عليّ ؟ هذيكة الفايدة

7 commentaires:

bacchus a dit…

مستحيلات بفضل الجهود المبذولة و المثابرة المتواصلة
حلوة هاذي ههههههه

WALLADA a dit…

شفت يا باخوس ؟

يجيش لبالك .

Anonyme a dit…

تدوينة حلوّة برشة يا ولاّدة،
ملاحظة صغيرة: راهو إنقولو "نبّاره" موش "نبّارين" كيما إنقولو "نجّاره" ولاّ "عطّاره" ولّا "خضّاره"، كلّها على فرد ميزان....

Walid from Radès

subjectif a dit…

هايل برشة اما عندي اعتراض على التونسي:ثمة تونسي ما يخدمش مخو الا وهو عمار خاطر لو كان جاء يخدم في مخو راهو طيش المقص

WALLADA a dit…

سبجكتيف

اعتراضك مقبول هههه


وليد

وزن " نبّارة و نجّارة ..." هذاك في لهجتنا الدّارجة و يقابلهم في الفصحى وزن الجمع السّالم " فعّالون " يعني نقولو " نجّارون ، حدّادون ... " و أنت ماشي

و كيف ما لاحظت في تدوينتي مضمون الخطاب بالدّارجة لكن الإطار السّردي بالفصحى مع غدخال بعض الكلمات الدّارجة للسّخرية

تحيّاتي

brastos a dit…

اللي شدّني في التدوينه الكل هو فعل "تفشخر"
تفشخر يتفشخر تفشخيرا .. ههه .. بربي منين جبتو هاذا ؟؟ .. سعيد باكتشاف هذا الفعل المعبّر :)صدّقني برشه سلوكات ديمه نشوف فيها في الدنيا و مانيش لاق لهاش الفعل متاعها .. ماله يبدو انّو هاذاكه هو "التــّفشخير" بعينه
:):):)

WALLADA a dit…

براستوس

الفعل في الحقيقة من العاميّة المصريّة رغم إنّي ضدّ إدخال عبارات هجينة في الكتابة و لكنّي لقيته يأدّي المعنى بالضبط
يقلّك فلان زعيم كان في الفشخرة علفاظي هههه