في الوطنيّة

توّا كي المواطن يحبّ بلاده بالقلب و الفعل و يعمل لمصلحتها و يدافع عليها في الدّاخل و الخارج و يلمّع صورتها و لو فمّة حاجات ماهاش عاجبتّه و لكن ما يسبّهاش و ما يعطيش وذنه للأجنبي ، و حتّى كيف ينقد ينقد بغاية الإصلاح موش الهدم ... هذا ما يتسمّاش وطني ؟
إمّالا شنوّة هالرّيق البارد متاع أنا وطني أكثر منك و هذاك موش وطني و لاخر وطنيته مشكوك فيها ... و هزّان و نفضان متاع ناس فاضية شغل و الكتب الّي قراوهم يتعدّو على صوابع اليد الوحدة إذا كان موش أقلّ .
إلّي هذا يتكلّم باسم البلاد و هو بركة الّي يخاف عليها .. ما كذبوش ناس بكري كي قالو " كثرت العمومة في السنين المشومة " و الّي هذا يتكلّم باسم الحزب ، شكون أنت ؟ شنيّة صيفتك ؟ آش تبيع في الحزب ؟ عندك خطّة قياديّة ؟ عندك مهمّة قاعديّة ميدانيّة ؟ مسؤول على التعبئة ، على الشباب ، على القواعد ، على الإعلام ، على المنظمات ... ؟ تنظّم في ندوات و حلقات حوار ؟ تعمل في مسامرات ؟؟؟ و إلاّ الحكاية الكلّ بطاقة انخراط ؟ هكّاكة آلاف عباد عندهم بطاقات انخراط ، و فيهم شكون منخرط قبل ما تتولد أنت و عن قناعة و عمره ما تمسّح بالبيبان و شدّ الصفّ في الكولوارات باش يقابل فلان و يساسي على رخصة و إلاّ يرفع قوادة . فمّا ناس خدمو البلاد بقلب و ربّ وقت احتاجتهم و لقّاو صدورهم للكرتوش و من بعد تلفّتو لأعمالهم و ربّاو ولادهم و عمرهم ما فكّرو في مقابل على وطنيّتهم و لا تشدّقو بيها في كلّ قعدة و لمّة . و لا عمرهم قالو بلادنا آش عطاتنا على خدماتنا بالعكس كانو ديما يؤمنوا بوحدة الصفّ رغم الاختلاف على خاطر الفرقة و المحسوبيّة و القوادة و الانبطاح .. كلّها سوس ينخر بدن الأمّة الّي سالت على خاطرها دمايات الشهداء

.
يزّيو من النّبش في نوايا النّاس ، ما فمّاش شكون يكره بلاده مهما يصير بالضبط كيما ما فمّاش شكون يكره أمّه. إلّي يقف في الصّباح لتحيّة العلم في المكتب و لحمه يشوّك يكره بلاده ؟ إلّي دموعه تسيل و يبطّل ماكلته كيف المنتخب يخسر يكره بلاده ؟ إلّي ياخذ موقف ضدّ قناة تلفزيّة يسمع فيها شتم لبلاده يكره بلاده ؟ إلّي يحرقه الحنين في غربته و يبدا يتلقّف في أيّ تصويرة والا غناية يكره بلاده ؟ إلّي عايش في الخارج و يبدا يجتهد و يقول يا قلّة الصحّة باش يلمّع صورة بلاده و يمثّلها بصفة تشرّف يكره بلاده ؟؟؟ مالا فكّو عالعباد و خلّيوهم يخدمو و شوفو حاجة تفيد بالحقّ اتلهاو فيها

نحبّ نختم بحكاية قديمة قريتها : كان الخليفة عمر بن الخطاب مارّا ذات يوم بأحد الأسواق إذ بصر برجل يعثر على لوزة ملقاة على الأرض فرفعها و أخذ يصرخ بأعلى صوته " من أضاع لوزة ؟ لمن هذه اللّوزة ؟ " فانتهره عمر قائلا : كُـلْهَـا يا صاحب الوَرَع الكاذب .