lundi 17 janvier 2011

يا عصافر باب بحر

يا عصافر باب بحَرْ
يا ساكنة الاشجارْ
تِزوي تغنّي تزقزق
زاهية مع النوّارْ
تهدي غناية حزينة
للغريب السّكرانْ
و الّي عاجبِـتُّه روحُه
تقذفه بنيشانْ

........

يا عصافر باب بحر
ما حْسِبتكم قدّاش
لكن بلا بيكم
هالبَرّ ما يسواش

.......

يا عصافر باب بحر
سكّتوكُم توّا سنينْ
فيكم الّي هجَر البَرْ
و عدَّى حياته غريبْ
و فيكم على كلمة: حُرْ
غْبِـرْ ورا الحديدْ
و فيكم الّي دخل البحرْ
الموت و لا التّنكيدْ 

....... 

يا عصافر باب بحرْ
اليوم الصوت هدَرْ
الياسمين دمُّه فاحْ
الظلام شعل جمَرْ
بالعامل و الفلاحْ
سرب الطيور ظهرْ
و الخوف منه راحْ

..........

يا عصافر باب بحرْ
الرّبيع هذا ليكمْ
صونوه بنبض الدمْ
الوطنْ راهو بيكمْ
بالعِلم و العَلمْ
تونس جديدة و حرّة
يا عصافر باب بحرْ

Aucun commentaire: