ميزيريا 9: بورتريه مسؤول فادد

 9 ميزيريـا 

بورتريه مسؤول فادد

البارح في الايّام كان كلّ صباح يسبّ القبيلة و التصيلة متاع ولاده باش يدزّو معاه الكركاسة الّي تنبّت له الشعر في لهاته حتّى يسخن موتورها و تخدم. و التسوميم خدّام من تحت لتحت بينه و بين مرته على شهريته الّي تسلـّو فيها بالفنتوز... فلقطتشي الزواولة مالدمّار، خرجوشي للشارع كي ماعاد بيها وين، خرجشي هو معاهم يعيّط من جملة من يعيّط، تحرّكتشي أسبابها و كلات بعضها، تلهاشي في هاك البوبلي و نسى يحجّم لحيته، جاتشي الانتخابات، مدّشي وجهه في اجتماع والا زوز و قطع يدين الحزازة أكثر من مّالي المول... أكاهو، رقد قام جاه تيليقرام " الرّجاء الحضور غدا في الخربة الفلانيّة لأمر يهمّكم" و يلقى روحه مسهول يضرب يصرع. هاك الخردة ولاّت سيّارة إداريّة و هاك الشهريّة حبلت و ولدت و زادت ولدت .. و زادت ولدت، و هاك الاولاد إلّي كان ياخذ في عشرة الاف مصروف ولّى طالب الزيادة و هاك المرا تفتّقت و هي النهار الكلّ تبلّ و ترشق عليه " هاي مرت المسؤول الفلاني خذات فيلا ترعب شبيها خير منّي ؟ و هاو المسؤول الفلتاني مرته تعمل في السهريّات و العشاوات و حطّت يدها على مشروع متاع ميزاب فلوس ياخي أنا مانضحّيشي؟ ماو تحرّك شويّة و شوف عَرفك فمّاشي ما نخلطو على حويجة ملّي يقسمو فيه..." و هات يا مرج. يسهر وذنيه واقفة كي قفـّة المرمّة يتبّع فالاخبار و عينيه عالتلفون يمشيشي يتقلب الطـُّرح عالجماعة الّي كبّش فيهم و ترصّيله على بَرّة، يخرّجولوشي دوسي محمّم قديم ناسيه و يتفضح؟ و يبدا مخّه يبربش بالكشي حرق مرّة الضو و هرب، بالكشي تعدّاله شيك بدون رصيد، بالكشي الفرخ ولده عمل عركة في المكتب و زرّق عين صاحبه، صوّروهشي مرّة و هو يصفـّق في اجتماع الشعبة في خدمته... ما يرقد كان وجوه الفجر. يقوم الصباح كرايمه مشكّلة ما فيه حتّى عظم صحيح كاينّه بايت يخدم في البالة و البيوش، مدقدق مهسهس مفولغ، وجهه مبجبج، يحلّ عينيه يلقى مرته قاعدة قدّام الكوافوز بدنها لكامت لكامت و راسها مرشـّق بكنافر الرولوات... يستعوذ مالشيطان و يقوم. وقت الّي يوصل لإدارته يلقى المعتصمين سادّين الباب. يقحرو، يعيّطو، يشيّرو عليه بيديهم و ما في فامهم كان كلمة ديقاج، كلّ يوم يدخل و يخرج بالبوليسيّة و الدزّان و السبّان فيه و في الكلاب. في بيروه الجديد ماهو فاهم شيء، قالو له هاك مسؤول لمكنتي ما عنده شيء، لا دوسيات، لا الخدمة ماشية، لا قدر لا هيبة، حتّى الموظفين إلّي ينطر و الّي يغيب كيما يظهر له، و الّي يتصرّف في معدّات الادارة بعين صحيحة، و الّي يصلّي و الّي يذن و الّي عامل اجتماع، و تدنـّى من هوني لغادي إضراب... و هو في وسطهم يجاوب عالتليفونات، مرّة عروفاته الكبار يندبو له بيد قطّوسة ميّتة، و مرّة تطلبه جريدة و إلاّ تلفزة باش يعطي حديث، ساعات يبلفطهم بكلمتين و ساعات يعتذر و يتسبّل بالخدمة، أما تلافز واما برامج، الراجل عقوبة الله في المسؤوليّة و جاته لقمة أكبر من فمّه يمشيشي يتهردز بكلمة تقوم عليها القيامة و تتلهى بيه الصّحاح... و هو في فمّ المدفع و في قلبه يسبّ في والدين النهار الّي خرج فيه للشارع يعيّط. نهار مالنهارات طلبته مذيعة مطروشة صغيرة، لسانها داير برقبتها مازالت مغرومة و شدّت فيه الباس، ماعاد بيها وين يلزمو يحضر في حوار تلفزي عالمباشر، شاور دزازة المشنّـقة عروفاته قالو له: إمشي و اعرف شتقول، مرته قالت له: وه بالطبيعة تمشي، خمّم يطلب المذيعة في الأسئلة الّي باش تطرحهم عليه.. خاف شكون يعرف وحدة فرططّو تمشيش تكشف له حاله و يمشي حنّة. قصد التلفزة عينيه محوّقة، حلقه مرّارة، قلبه يعصر، مالمان لقفوه لوّطو له وجهه بالفون تو تان، لبّدو له شعره بالكريمة... و هو في يديهم كعروسة الشوالق، قعد في الفوتاي قدّام المذيعة، نبّهته الّي هوما عالمباشر، شعلت الاضوا، بات الحسّ، أيا قدّمته و رحّبت بيه، هي قالت السؤال الاوّل و الرّاجل كان يعقل، تنفض من فوق الكرسي كشاكشه طلعت عينيه زعزت و بدا ينتّش في حوايجه و يعيّط : فدّيييييييييييييييييييييييييييت. و ما تسمع كان العيطة: كوبي، كوبي، كوبييييييي.