هل وصل الإرهاب للبلوغسفار ؟؟؟

توّا مدّة قاعدة نشمّ في ريحة ماهاش باهية ، تقولو انتوما على خاطر مرا حاسّة الشمّ تتطوّر في الكوجينة و الحاسّة السّادسة عندها معروفة . لا ، مانيش باش نتعسّف على الأحداث و لاني باش نحمّلها فوق طاقتها . هي ظواهر كي تجي تشوف باينة للعين المجرّدة بركة مستحقّة شكون ينفض عليها الغبرة ، ما نعرفش إذا تلاحظو و تتعدّاو و تقولو عادي ؟ و إلاّ البعض موش فاطن ؟ و إلاّ البعض لاخر مساهم فيها ؟

التدوين دخل في زنقة حادّة و تحصر بين زوز حْوِمْ و المعبوكة هي بيدها و النّاس بدات تفدّ ماللّوبانة الّي ولاّت لا طَعم و لا نكهة حتّى أصبحنا متعطّشين لكلّ موضوع خارج عليها .

دخلنا في مرحلة متاع لغة جديدة ، أنا شخصيّا نرى فيها إرهاب أو بالأصحّ ترهيب لفظي و مانيش باش نذكر منّه مشاطر و لكنه يتمثل في :/ نعت الشخص المخالف بالعهر الحقيقي أو الفكري مع ما يرافق النعوت هذه من كلام بذيء نفـّر برشة أقلام ما يشرّفهاش التورّط في لغة الشارع / التعامل مع الخصوم موش بعناوين مدوّناتهم و لا حتّى بأساميهم الافتراضيّة و لكن بصفة قناعاتهم الايديولوجيّة أو صفات يصرّ البعض باش يلصّقها لهم / وصولا إلى ما يشبه التهديد في بعض التعليقات من نوع " ردّ بالك " ، " هذا سيعود عليك بالوبال " ، " حذار بالأنقليزيّة " ... و هذا نرى فيه ترهيب

لجوء العديد من المدوّنين للفايس بوك ، لقاوْ فيه مجال أوسع و اكثر حريّة باش يكتبو موش كان مقالات ولكن حتّى شعارات و إلاّ خواطر صغيرة متاع وقتها أو جمل قصيرة فيها رسائل موجّهة للّي يحبّو هوما ، و لقاو التعامل بالصورة و الكاريكاتور و المقاطع الصوتيّة أسهل برشة و اسرع في النشر، و نسبة كبيرة منهم انتقلو للفايس بوك عن قناعة و اختيار على خاطر لقاو فيه راحة البال من النقاشات البيزنطيّة و تطييح القدر و الكلام الزايد ، لكن موش هذا المهمّ
المهمّ ، أنّك في الفايس بوك كيف تكتب أفكارك أو تعلّق على أفكار غيرك و تصوّتلها ما يشوفك كان أصدقائك إلّي أنت اخترتهم و الّي القايمة متاعهم في مدّ و جزر ساعات تزيد البعض و ساعات تحذف البعض لاخر ، في حين أنّك في التن بلوغ كيف تكتب تدوينة و إلاّ تعلّق على تدوينة غيرك و إلاّ تصوّتلها ، البلوغسفار الكلّ تشوفك . تقلّي آش يهمّني أنا مؤمن بأفكاري و مايهمّنيش في الّي ما تعجبوش ، لا يا سيدي هاو ظهر يهمّ . و الدّليل أنّه نفس النصّ يتكتب في التن بلوغ ما يصوّتو له كان قلّة قليلة و ما يعلّق عليه كان أقلّ في حين نفس النصّ هذاك يتنشر في الفايس بوك يحضى بترحيب واسع و بتعليقات تفوت ساعات العشرين تعليق ، و هذا مجرّد مثال : كتب صديقنا كلندو مقال بعنوان " في البيع.. و المبايعة " نشره في التن بلوغ صوّتو له 7 مدوّنين و علّقو عليه 3 ، و نشرو في لفايس بوك صوّتو له 11 صديق و علّقو عليه 26 . هذا بخلاف إلّي لاعاد يكتب لا في الفايس بوك و لا في التن بلوغ و فضّل الصمت . و مانيش هنا باش نعلّل و إلاّ نستخلص استنتاجات أنا فقط نلاحظ في الظاهرة