jeudi 20 août 2009

حكاية من غااااادي

قال لها : يا شاغلة بالي ليّعتني بشِدّ الهوى يا دوجة ، يا راحلة وقتاش ليَّ توَلّي ؟
قالت له : توحّشتْ ريحة البلاد لو كان موش الصّبر يطفي ناري راهو عمري راح في الغربة فناني
قال لها : ما نخبّيش عليك محوني كي بغيتْ تطير يا حمامة آش يفيد الملام في قلب المُضامْ
قالت له : مكتوب ، ظلموني حَبَايْبي لكن مُحال كلمة آه تبري العلّة
قال لها :يالّي عيونك في السّما نظرة من عينك تسحرني احترتْ شنهديلك يا حلوّة
قالت له : ما نحبّش فضّة و ذهب ، يزّي ما لاموني الّي غاروا منّي و قالو لي هاالزّين هذا لواش
قال لها : لا نمثّلك بالشمس لا بالقمرة إذا تغيب عليَّ يا ولفتي فراق الحيا يذبل الرّوح لكن ما تخافش بعد النّكد و الغصَّة يدور الفلك و نروّحو للمرسى
هذه حكاية زوز حمامات ياريت ما راها لا راته ، هو ينادي يا دار الحبايب قلّي رحلو فين و هي تقول اللّيل آه يا ليل جيت نشكيلك . و العالم يضحك على محبّتهم ، عالم مكبوت يخاف من الضوء و الحبّ و الجمال و الكلمة الحنينة

16 commentaires:

Hamadi a dit…

حكاية من قاع الخابية
Magnifique

nifertiti a dit…

ابدعت يا ولادة روووووووعة

عمشة ف بلاد العميان كحلة لنظار a dit…

خوفونا مالضوء و قالولنا التحسحيس في الظلام خير و كل شي بستر الله، الحيط للحيط و رد بالك تضّويلهم

خوفونا مل الحب و قالولنا ديما عقلك
في راسك خير، الحب شر، يضيّعك، حرام يهزّك لجنم و بئس المصير

خوفونا مالجمال و قالولنا غطّي غطّي راهو فتنة، ما تعيشش
اليومة عيش لغدوة
خير

خوفونا مالكلمة لحنينة و قالولنا ضعف و راهوالسكات خير

قتلولنا احساسنا باسم الدين و المجتمع و ما ثمّاش أتعس من هالمصير

WALLADA a dit…

حمادي

مازلنا ما وصلناش لقاع الخابية ، نخاف لا نوصل له نقعد غادي


نفرتيتي

شكرا مرحبا بيك



عمشة

الخوف ما يجيش مالغير ، من برّا . الخوف دخلاني يلزم نقضيو عليه كان نحبّو نبدعو

ART.ticuler a dit…

فكرت نعمل نفس الشيء لكن بعناوين التدوينات :-)

عمشة ف بلاد العميان كحلة لنظار a dit…

صحيح الخوف دخلاني، أمّا يظهرلي إلّى الخوف من أهم الأسلحة إلّى خلقها الإنسان بش يسيطر على الإنسان، الدين مبني على الخوف مالموت، الدكتاتوريّة مبنيّة على الخوف من المستقبل، العلاقات الاجتماعيّة مبنيّة على الخوف من الوحدة، الخوف أول حاجة نعلموها لصغار، رد بالك، يزّي، حرام
الخوف عندو سلبيّات و إجابيّات كيف أحنا نسيطرو عليه و نوظفوه باش نقدمو موش بش يجبدنا هو لتالي

WALLADA a dit…

آرت

علاش لا ، المهمّ الصّلة المعنويّة موجودة

WALLADA a dit…

عمشة

أنا هاززني الحنين لطرب الزمن الجميل و رومنسيّة تفقدت في عالمنا الإسمنتي على البلاستيكي الّي عايشين فيه و أنت تحكيلي على الخوف و الموت ، لاه شعمتلك ؟

موش كلّ شيء نحشرو فيه الأديان و السياسة ، الخوف قديم قدم الإنسان وقت الّي خاف من الظواهر الطبيعيّة قبل ما يفهمها ، العلم نفسه يدفعه الخوف من العجز و الموت و الإنقراض و كان ماجاش الخوف هذاك راهو ما قدّمش اكتشافات و اختراعات أضافت للإنسانيّة

عمشة ف بلاد العميان كحلة لنظار a dit…

ممكن عطيت بعد للبوست موش هو، أمّا انت تعرف إلّى أي نص باهي قابل لبرشة تآويل و إلّى النص ملكية إلّى كتبو وإلّى قراه زاده،
ممكن نظرتي حزينة شويّة و متشائمة، أمّا موش منّى مالدوايات راهو متاع الإكتئاب:))))
لا نفدلك عليك و نتمنّالك و نتمنّى لينا الكل برشة حب و جمال و كلام حنين:))

WALLADA a dit…

عمشة

مرحبا بيك في كلّ وقت و تصرّف في النصّ كيف ما تحبّ يا للاّ موش التدوينة هذه برك ملكك ، المدوّنة الكلّ تحت تصرّفك تنجّم تعلّق على أيّ نصّ مالقديم و إلاّ مالجديد

و نحّي عليّ الحزن و التشاؤم أنا في عمرك نهدّ في الدّنيا هدّان قراية و كتيبة و قضية و علاقات اجتماعيّة و نهار و طوله و أنا نزنّ بالغنا و نضحك و ديما عندي ثقة إلّي غدوة باش يكون خير ماليوم و البارح

Ignescence a dit…

You are the one formi, formi, formidable
Ce que t'écris est dési, dési, désirable
Et j'aimerais toujours, te lire, même tes délires
Dans la langue d'Ibn Mandhour ou de Shakespeare
;)

(qu'Aznavour m'excuse pour le plagiat)

brastos a dit…

قاللها : علّموكي علّموكي الهجر .. علّموكي تحيّري الفكر

قالتلو : ياما قلبي يطير و يجنّح .. و يولّي يسامح و يصفح

قاللها : بعدك الدّنيا خاليه .. و
لعيني الدمعه ماليه ..

قالتلو : كيف ما يرجع الفرططو للنار اللي تحرقو .. نرجعلك حاير و مهنّي .. انت و قلبي أقوى منّي

حقيقة يا ولاده ، على هالتدوينه الرايعه مانّجّم كان نقلّك :

"معنى الجمال هو انت"ـ

:)

Dr.Gnitekram a dit…

روعة Merci beaucoup, je ne peux que vous remercier pour ce que vous avez écris..

WALLADA a dit…

Ignescence

Merci




Dr.Gnitekram

Merci

WALLADA a dit…

براستوس الفنّان


إضافاتك حلوّين ياسر ، فكّرت فيهم و في غيرهم ، جيت باش نقدّم نلقى زهر البنفسج بكّاني و سمعت فنّان يغنّي تبّعني نبنيو الدّنيا زينة دنية فنّ و كيف و عيشة بنينة و من دنيتهم فكّنا يزّينا

ennadhour a dit…

vous avez accouché d'une belle créature...vous êtes vraiment WALLADA.
Bis!!