vendredi 25 décembre 2009

تدوينة بيضاء من أجل حريّة التدوين و التعبير

8 commentaires:

La7mer a dit…

سلام ولادة .. علاش معشر المدونين مانحاولوش نعملو نوع من رسالة مفتوحة على الفايسبوك مثلا .. نلمو فيها تصحاحات الناس من جميع الأطياف السياسية خاصة أعضاء الحزب الحاكم و المدونين إلي فدوا من عمار و تصرفاتو
نحاولو نتصلو بالمشاهير من دومان الفن و السينما و الأدب نطلبو دعمهم .. علاش لا تسجيلات صوتية ولا فيديو لفنانين يشجعو الناس باش يصحو و نبعثو الرسالة لمجلس النواب باش يطرحو هالمسألة مرة أخرى للتصويت وينحيو علينا هالوليّ القصري إلي حطوه علينا

المدونة البيضاء خذات وقتها و يظهرلي جا الوقت لمحاولة أشمل و أحسن و أعم

WALLADA a dit…

أهلا لحمر

أي شبيه ، فكرة غنيّة و اقتراح مشروع ايا خويا على يديك نحجّو أعمللنا قروب في الفايسبوك بالمواصفات الّي قلت عليها و ما نتصوّرش النّاس الّي تنادي بحريّة التعبير باش تعكسك فيه

kacem a dit…

ولادة شنوه حوالك ! ؟ عندي مدة على المدونين ..و لكن كما العادة راهو ما إفوتني شيئ! و مازال إنتبع ...

2- كما قتلك ...إما تأتي عليّ و إلا أتي عليه ..الحكاية هذه متع الكتيبة !

3- وقتاش مجلس النواب إحل و إسكّر ...هاذوكم ...ناس ما عندهم حتى قيمة ..دستورية !!!

4- الفكرة الباهية ..و الساهلة ..هو تشجيع الشباب على حل مدونات جديدة ..يعني بالعربي ..الآولاد متع الليسيات و متع المدارس الآبتدائية ..تتصلو بيهم و بالمعلمين و الآساتذة متاعهم ...باش إعلموهم كيفاش و إشجعوهم على الكتابة و القراءة ...لآنو على قد ما إتحل الفضاء التدويني و يكبر ..على قد ما عمار إضيع فيها قع

5- الفكرة الآخرى لا بد من خلق ...تن بلوق جديد ...يبدى بخمسة أو ستة مدونات صحاح ..لآنو تن-بلوق متع الحسين هذا ...شكشوكة ..و ماهوش قايم بحتي شيئ !!!! الكونكيرونس راهي إتجيب ...

WALLADA a dit…

أهلا بسي قاسم مرحبا بيك

صحيح المنافسة باهية و كثرة الفضاءات التدوينيّة إثراء للتعبير و لكن إسمح لي من غير ما نذمّو حسين لأنّه موش من طبعي ذمّ الناس كيما ماذابيّ ما يتذمّوش في مدوّنتي


أما كيف تقلّي" نحلّو بلوغسفار جديدة تبدا بخمسة أو ستّة مدوّنات صحاح " هوني نقلّك

علاش خمسة و أو ستّة مدوّنات ؟ ماكش هكّة تمارس في الإقصاء و أحنا في نهار حريّة التعبير ؟


آش معناها مدوّنات صحاح ؟ ياخي فمّة مدوّنة صحيحة و مدوّنة تروا سيلاندر ؟


ثمّ ماهم كانوا موجودين المدوّنات الصّحاح في التن بلوغ ، سألشي البعض نفسه وين مشاو ؟ شنوّة الّي نفّرهم و طيّر لهم الكيف

La7mer a dit…

اليد وحدها ماتصفقشي .. وحدي مانجمش لحكاية تحب وقت و عزيمة و إصرار من مجموعة كاملة متطوعة تخدم ليل ونهار من غير ملل حتى لين يذهب سي عمار

المبادرة متاع التدوينة البيضاء تم تسييسها برشة خصوصا من طرف المعارضة .. و المدونة متاعها تم حجبها .. مانيش عارف علاش بالتحديد لكن أنا شبه متأكد إنو هالمبادرة حادت عن هدفها الأساسي و تبنات أمور أخرى من قبيل المحضورات

على هذاك أنا نقترح تعلم الدرس و نعملو مبادرة جديدة باسم جديد و هدف واحد أوحد يتلمو عليه معارضين و موالات .. حزبيست و موالات .. من غير سبان و لا حتى انتقاد .. ولا احتجاج ولا دفاع عن مدونة زيد أو زبيدة .. فقط مجموعة مواطنين ناخبين يستعملو في الأنترنات من جميع المشارب و خصوصا من الحزب الحاكم يطالبو في وريقة النواب يفهمونا و يفهّمونا الدولاب كيفاش يخدم ويقولو صراحة وينهم الخطوط الحمراء لأنو المقص ما رحم حتى حد و الكل بمن فيهم المنخرطين في الحزب الحاكم فدو من التخلف و فدو من هالوليّ القصري إلي حطوه علينا

يعني موش معقول في دولة تحب تولي في أفق 2020 دولة متقدمة مزالت فيها شي إسمو رقيب .. عقلية تعامل في المواطن على إنو غشير و قاصر و ناقص وعي و ما يعرفشي مصلحتو وين و لقمة سائغة للتطرف الجنسي و الديني و الفكري و السياسي

أنا مستعد بش انساعد بلي نقدر عليه في الإتصال بالفنانين و المشاهير و الصحافيين إلي نعرفهم ولي ما نعرفهمش ونلح عليهم باش يقولي كليمة حق في هالوضع لمقود

آما فيما يخص النواب .. الهدف هو ابلاغ صوت قوي و اقتراح عليه نسبة إجماع ثم حثهم باش يتكلمو و يقولو على الأقل آش فمة بالضبط أو الإعتراف بعجزهم إن هم عاجزون ثم إحراجهم نوعا ما مع الأمل إنو تتحرك فيهم شعرة سيدنا علي ويدزو فازتهم على الأقل مريرة في التاريخ ويركبو على موجة هوى الشعب .. كيما لازم الرسالة تكون واضحة إنو الموقعين باش ينتخبو أي نائب يتعهد بتَسْحيت عمار

وحدي مانش إنت عندك ترافيك على مدونتك و الناس تحترمك حسب ما ريت فيالله إلّي عندو سطل يتفضل يدلي بيه برشة ماء مشى للسدرة والزيتونة قريب تشيح

kacem a dit…

1- أفهم مليح ...أش إنقول : النص الي تكتب على مدونك و إلا على أي مدونة أصبح ملك الجميع ...في الحالة هذه ما عاش مدونتك ..بل مدونة المجموعة الكل ! يعني بالفيزيك في الاونة ديتي ! إنتهى الآمر متع ممارسة الملكية !
2- بالنسبة لقاسم ..نظرب في أي لحضة و على أي مكان في الارض ..مش كلن في المدونات ...أي مدون و إلا شطر مدير ..يلعب بفضاء ..كبير ..أكبر منو ! الفضاء التدويني ..أكبر بكثير من واحد لا يفقه في الكومينيكاسيون شيئ ..و أكثر من ذلك ..إترفك و إصمصر بالمدونين !!! و لذلك العصى ...! القوة إتجيب
3- إنعم ثمة مدونات صحاح ..و ثمة مدونات الشكارة و البحر ..مش 3 سيلاندر ...أفهم العلم إقول بالكلاسيفيكاسيون ...السيقمونتاسيون متع كل شيئ ..حتى متع المعلومة ..باش تسهال عملية التواصل !!!
4- فضاء تدويني صحيح و منضبط ..و قادر باش إحل اللعب أكثر أصبح ضرورة قبل الضرورة !!! فهمتي ! و إلا ؟ ..ستة ، عشرة مدونين صحاح ، عندهم ما يكتبو م ما إقولو ..قادرين باش إحلو فضاء جديد ...إقوم بمهمتو التاريخية ..
4- بالنسبة للمدونين ...لابد من توجيه الصراع ..الي القواعد ...يعني ألي الاسفل و أعني الفورماسيون متع الشباب ..و الحيل الجديد ..لازمهم ..يتبراباجاو في كل المدارس و في كل المعاهد ...باش نصنعو جيل جديد ..يعرف يقرى و يكتب و إشارك في صنع الثقافة ..و الفن ..و علاش السياسية ...إنعم برامج طويلة المدى ...و لكن صحيحة ..أصح من الحجر.

La7mer a dit…

يا سي قاسم سامحني آما يظهرلي كلي كلامك فيه برشة تمخوير و جرعات ماهيش لاباس بيها من شحنات سلبية سالبة جدا

كيف سياتّك تتشكى من الصنصرة و العصا متاع "شطر المديرين" علاش تشمر على لوشام في ذراعك و تحكي بيديك وادّيّق على خلق ربّي ؟

بعدين لغة و قانون "الشكارة و البحر" اذْهِب مع الباي و حسب رأيي إلّي يقول بروحو هكا متنوّر يلصف لصفان و ألمعي و حاسب روحو مالمدونين "الصحاح" ما يحكيش بلوغة لفصايل و الزلالط

شنوة "فضاء" و شنوة "كبير" و "أكبر منو" .. بانا مقياس ؟ مقياسك ؟ هيه خلّي كل واحد يغني على مقياسو يالخو .. ولاّ سياتّك صاحب رسالة و نبي تشوف في الناس حولك ضايعين فيها ؟ علاش حطيت ذاتك لعزيزة أربيتر تكبّر واتصغّر كيما حبلك خاطرك .. و من فوق تحب تفرض أحكامك الفذّة على الكل البشرية بشموليّة .. ماو بالعقل ماتعاملش غيرك بالشي إلي ما تقبلوش في نفسك .. ولاّ حلال عليك حرام عليهم ؟

تواضع ترّف يا مواطن قالّو "فضاء تدويني منضبط" إنضبط إنت لوّل .. و من وقتاش كانت العملية التدوينية كالغازرنة ؟ الناس الكل قرعة و زي موحد و صف واحد و خطوة وحدة .. وَحْ ثنين .. وح ثنين !؟ يزينا مالأحكام المحقّرة للناس و خلي خلق ربّي تكتب آش ماتحب و كيما تحب مسقفين ولا عرايا ولّي مدونتو ولا "فضاؤو" ما جاكش عالمضّاغة بينك و بينو نقرة جربوعك

سيب عليك ماللغة الخشبية و المصطلحات الفارغة متعاع "توجيه الصراع" و "تاريخي" و "القواعد" و "أجيال جديدة" و "عمل قاعدي" و واقفي ولا شنوة .. بالك حرب هي ؟ ولا حلقة صراخ في قناة "البشيرة" .. يزينا خويا مالكلام الزايد و القتامة و السلبية و التحقير و التمخوير

La7mer a dit…

أه نسيت حويجة .. مشيت عملت طلّة على مدوّنتك .. نلقاك عامل فيها سطيّر هام ماللّوطا .. ظاهر فيك نسيتو كي جيت تقرّي فينا هوني عال فازت الملكيّة الفكرية .. السّطيّر يقول "جميع الحقوق محفوظة" من غير مانزيد انطوّل في التعليق