samedi 16 juillet 2011

أحنا عرب ما يعجبناش العجب

أحنا عرب ما يعجبناش العجب ، لا عجبنا الّي يفكّر و لا عجبنا المسَكِّرْ ، لا الّي يصلّي و لا الّي يسْكِرْ ، لا الّي هبط للشارع صاح و ندّدْ و لا الّي ورا حاسوبه لابِدْ و متردِّدْ ، لا عجبنا المتربِّي و لا عجبنا القبيح ، لا عجبنا الفريفطة و لا عجبنا الرّزين ، لا عجبنا الّي يقول و يعمل و لا عجبنا الّي يقول و ما يعملش و لا الّي لا يقول و لا يعمل ، لا عجبنا المستكفي بنفسه و لا الّي كي يشوف مصوّرة هو الاوّل يمدّ وجهه، كان كتبت و ما هبطّش للشارع نقولو هذا زعيم كان ينبّر ، و كان هبطت للشارع و ما كتبت شيء نقولو هذا وقتاش حدث ؟ عمرنا ما قرينا له كلمة
لا عجبنا الضّارب و لا عجبنا المضروب ، لا عجبنا المِسْتوِي و لا عجبنا المقلوب ، لا عجبتنا الهيئة و لا الّي في الهيئة و لا الّي خرج مالهيئة ، لا عجبونا ولاد المْدينة و لا عجبونا أهل الارياف ، كان تتكلّم توَلِّي تفتِّنْ و كان سكتت تتسمَّى خوّاف ، كان تحرّكو الصّغار نقولو مفرخ تتناقز و كان تكلّمو الكبار نقولو هزّ علينا هالكمشة عزايز ، لا عجبنا الّي يتكلّم بالدّارجة و لا بالفصحى ، أما الّي يتكلّم بالأجنبي هذاك يولّي ولد فرانسا ماسوني متصهين
حتّى على اسم الثورة ما اتّفقناش ، قلنا ثورة الياسمين قالو تسمية برجوازيّة ، الدمّ للرّكبة في داخل البلاد و أنت تقلّي ياسمين ؟ ، قلنا ثورة الحريّة و الكرامة قالو وين تشوفو فيها الحريّة و الكرامة ؟ يسخايلوها صبيغة مَلِّسْ اليوم تطلع غدوة و إلاّ هوما قاعدين و هي تتهدى لهم هناني بناني ، قلنا ثورة 14 جانفي قالو بالله يزّيوْنا من تأليه التّوارخ ياخي باش ترجّعولنا 7 نوفمبر ؟ قلنا ثورة البوعزيزي قالو استنَّى السّاعة نثبّتو فيه مات شهيد و إلاّ حُكمتْ له السِّكرَة
الله يسامح هالوقت كي خلَّى الّي يخنتب كليمتين و إلاّ يحضر في وقفة احتجاجيّة ولاّ ثنين يولِّي لي " ناشط حقوقي " و يبدا عاد " استنّاوني اليوم في القناة الفْلانيّة .... هذا تصريحي للجريدة الفلتانيّة ... " ههههه بالله قولو للنّاس هاذم يعملو طلّة على النّاشطين بالحقّ في البعثات الأمميّة للإغاثة في الصّومال و في أفغانستان و غيرها ، و يشوفو نساء و رجال خلاّو عايلاتهم و بلدانهم و مشاو ساكْ على ظهوراتهم و هوما من دشرة لدشرة ياكل فيهم الذبّان و القمَل و الكرتوش يخيّط و ساعة ساعة يتخطف واحد منهم و إلاّ يتقتل . علاش ما نجّموش نكتبو و نحتجّو و نتظاهرو و نتضربو كان لزم و احنا باقي في صفوف الشعب ؟ لازم نمرضو بعقدة البروز و نولّيوْ أحنا الصّحاح و غيرنا الكلّ غالط و ما عاد يعجبنا شيء ؟
أما حَدّ ما عليه بلوم ، اللّوم الكلّ على آش و خمسين سنة سَحْق و مَحق للشخصيّة ، من " المجاهد الأكبر" لـ " صانع التغيير " ديما فمّة منقذ يفكّر في بقعتنا و يتكلّم في عوضنا و الّي بلا بيه راهو كلانا الحافر و مشينا بذرور ، أكاهو كي جات الفرصة و تحَلّ اللّعب النّاس الكلّ تحبّ تولّي كلّ شيء ، ثوريين مولتي سيستام ، و نساوْ الّي في كلّ ثورات العالم فمّة الّي ينظّرو و يكتبو و يدَّنّاوْ لتالي و هاذوكم الّي يتسمّاو الآباء الروحيين للثورات و فمّة القادة الّي تتوفّر فيهم كاريزما تأهّلهم باش تلتفّ حولهم الجماهير، يتأثّرو بتنظير المفكّرين و يطوّعوه للواقع و يخطّو للثورة إعداد و إنجاز و متابعة ، و فمّة أهل الميدان الّي بقعتهم الشوارع و السّاحات و هوما ذراع الثورة الفاعل ، حتّى واحد ما ياخذ مهمّة لاخر و لا يجي منّه يعمل كلّ شيء
العربيّة الفصحى لغة مقعارة برشة ، البارح عجبتني جملة بالانقليزيّة قالتها في فيلم ممثّلة لصديقها حاولت نترجمها هكّة : إذا كانت أفكارك تدلّ حقّا على مستواك الذّهني فإنّي أعتبرك محظوظا لكونك لا تزال قادرا على ربط شريط حذائك

و سلام

17 commentaires:

eddou3aji a dit…

هذا هو
:)

abou.nizar a dit…

برة يرحم والديك ... نحيتلي خمجه على قلبي !

WALLADA a dit…

دوعاجي

مرحبا بصديقي راني نتبّع في مسيرتك التمقعيريّة المظفّرة هههه

WALLADA a dit…

أبو نزار

شكرا على مرورك و التعليق

تحيّاتي

Anonyme a dit…

tu n'est pas obligé d'être quelqu'un ou quelque chose sa suffit que tu soit juste et que tu accepte l'avis des autres ,une révolution par principe vient pour des raisons de liberté de choix de vie et tant que tu impose pas au autre tes visions par forces tous le monde peut penser ce qu'il veut mais ne peut pas dire ce qu'il veut .on a déjà assez honte de cette révolution parce que personnellement je ne savais pas que des tunisiens était capable de tuer ou de violé d'autre tunisiens pour faire plaisir à ben ali ou a les trabelsi ,maintenant j'ai toujours aussi honte de savoir qu'il y a des tunisiens qui appelle à violer des tunisiennes sur you tube parce qu'elle ne porte pas le voile ,j'ai aussi honte de savoir qu'il y a des gens devant la justice parce qu'ils ont donner un point de vue que d'autres ne sont même pas inquiété eux qui appelle à la haine et la violence ,j'ai honte d'un premier ministre qui dit qu'il n'y a pas eu de snigpeurs ,j'ai honte de ministre de la santé qui ne s'occupe pas des blessés de la révolte ,j'ai honte de ses barbues qui veulent tous une dictature religieuse ,j'ai honte de ses gens qui sont capable de vendre leur âmes au plus payent ,j'ai honte de ses blogueurs qui vend leur page fb ,j'ai honte de ses gens qui ont oublier qu'il y a des familles tous les soirs qui dort affamé ,j'ai honte de ses parties politique qui veulent une place au pouvoir ,j'ai honte de ses gens qui détesté les trabelsi parce qu'il veulent faire comme eux ,j'ai honte de ses journaliste qui ne savent pas ou ne veulent pas faire leur travaille,j'ai honte du peuple qui se laisse manipuler par l'un et l'autre ,alors soit toi et aime au autre ce que tu aime pour le plus cher dans ton coeur c'est suffisant .

cactussa a dit…

برشا كلام كنت حابة نقولو أما ببرشا سبان هاك قلتو ولادة بطريقة و جاء في الصميم ............شكرا

WALLADA a dit…

غير المعرّف

قلبك معبّي و نشرت تعليقك باش تتفرهد و لكن أرجوك تنجّم تخجل بكلّ شيء و لكن لا يجوز و لا بأيّ حال من الأحوال إنّا نخجلو بشعبنا ، الشعب أنا و أنت و خوك و جاري و ولدي و بوك ... كفاه ما عانى و هو اليوم ليس حمل تخلّينا و أحكامنا المسبقة

دمت

WALLADA a dit…

كاكتوسا

من وقتاش السبّان وصّل فكرة و إلاّ جاب نتيجة ؟ نعرف الّي العوج برشة لكنّا مدعوّين أكثر من أي ظرف آخر للتعاطي مع بعضنا بالعقل موش بالعاطفة

دمت صديقتي

الحلاج الكافي a dit…

"الثورة بداـ بشعار ّ"فلوس الشعب ياسرّاقة" و و "التشغيل إستحقاق يا عصابة السرّاق ّ" و "يسقط جلاّد الشعب يسقط حزب الدستور " و انتهت ب " ديقاج" أي إرحل .... لم أرى فيها أي شعار آخر ما عدى هذه الشعارات المركزية ...اليوم...يتحدّث المناوؤون للثورة و للحرايات عن إقامة مجتمع قروسطي ظلامي...كرهت التورة منذ أن خرج جراء طالبان الى الشارع التونسي...هل دفع الشهيد دمه من أجل هذا ؟؟؟؟

WALLADA a dit…

حلاّج

بدل كره الثورة عليك أن تكره سارقيها و من يحاول إجهاضها بكلّ السّبل و هم للأسف كثر و من اتّجاهات مختلفة ، و أنت تعرف ما يحدث للبقرة حين تكثر سكاكينها

Oussama Haoues a dit…

دمت مبدعة كما عهدناك يا ولادة، تحية إكبار و تقدير

WALLADA a dit…

العفو يا سيدي ... تاتا هههه

و مرحبا بك

Hamadi a dit…

برا يرحم ألام إلي جابتك ... على قول المحلل السياسي الخطير المختار التليلي

WALLADA a dit…

حمادي

شكرا صديقي

Unknown a dit…

اختلط الحابل بالنابل

و كثرت الترهّات و كلٌّ يغنّي على ليلاه ...

هكذا نحن العرب ( هذا الزمان ) نريد جنازة لنشبع فيها لطم

تحياتي لتشخيص واقعي و حيادي للمجتمع .

منجي


http://zaman-jamil.blogspot.com/

WALLADA a dit…

منجي

فعلا ، اشاطرك الرّاي تماما

شكرا على الزيارة التي أرجو ألاّ تنقطع

تحيّاتي

Anonyme a dit…

يسلم تمّك...هكذا هم العرب