قـالّـك أرسطو هو الّي ترجم القرآن

البارح قاعدة كالنّاس الملاح نصلّح في امتحانات الإنشاء العربي و نطيح بـدُرَر أهوْكَ كلّ مرّة نتحفكم بحويجة قالّك يا سيدي أرسطو ترجم القرآن مالفرنسيّة للعربيّة ، و الطّاهر الحدّاد أضاف للإنسانيّة بآختراعاتة الطبيّة و الكيميائيّة خاصّة ، و قالّـك زادة قال تعالى" إذا الشّعب يوما أراد الحياة فلا بدّ أن يستجيب القدر " و هات ماكالاّوي و المرّة الجاية نتحفكم بالجديد.أما تعرفوا يا جماعة بعد الضّحك الحكاية تخلّف مرارة ، بعد ما نقرّي و نورّي و نفهّم هذي النتيجة الّي نحصّل عليها. قولولي العيب فين فالجيل ولاّ في التعليم ولاّ في السيسْتَامْ الكلّ؟