لو كان جا التدوين بالفلوس

تخيّل لو كان جا التدوين بالفلوس هههههه راهو الطّايح أكثر مالواقف . تصوّر لو كان ما جاش التدوين نفحة ، لا سيدي التزام بعدد معيّن من التدوينات تُـخلُصْ عليهم كيما تحبّ بالكانزا و إلاّ بالشّهر و إلاّ كلّ تدوينة بحقّها و فمّة زادة منحة الإنتاج للّي يحربها بالتدوين ، و كان تزيد تنشر في الفايس بوك يعملولك سوم . و هاك الّي ما عندهمش مدوّنات و يدخلو باش يعلّقو بركة هاذوكم ينجّمو يُخلصُو بيجيسْتْ ، و هاك الّي مصنّفين هاذوكم خلاتْ عليهم شهاريهم تاقف حتّى يتبيّن / الخيط الأبيض من الخيط الأسود / نضجهم الفكري و مدى قدرتهم على التحليل هههههه ، و كلّ واحد يكتب باسم مجهول ياخذ تسبقة على الشهريّة حتّى يكمّل بطاقة عدد 3 للدّوسي متاعه ، و حتّى كي تبدا قزوردي و تجيبها قفّة و بندير ما عندك وين توصل لاهم باش يزيدوك في الشهريّة و لاك باش تولّي كاهية المدير متاع البلوغسفار رتّح دندانك و رَيّض اللّعب

.
أما ردّ بالك الشهريّة ماهاش مسَيّبة هكّاكة ، فيها قصَاصْ و أداءات . أهمّ حاجة ، يقصّولك للكنام باش كان واحد مرض و إلاّ مِكنُه عصَبْ مِلّي قاعد يتكتب و إلاّ حدِثله سقوط و طاح ما في عينه بَلّة في عركة افتراضيّة أهوك عنده تغطية صحيّة باش يداوي

.
و عمّار ، في عوض يقعد يكسّر في راسه و يحجب لك في مدوّنتك يولّي يبعثلك خطيّة ماليّة كي جمعيّات الكورة و كان تلمّ ثلاثة خطايا في العام ما يجدّدولكش الكنتراتو هههه آلاف يستنّاو في بلاصتك

زعمة كان جات الامور هكّة نتلهاو ببعضنا و إلاّ نتلهاو برواحنا و إلاّ ندورو على الاخرين ؟