lundi 23 février 2009

لو كان جا التدوين بالفلوس




تخيّل لو كان جا التدوين بالفلوس هههههه راهو الطّايح أكثر مالواقف . تصوّر لو كان ما جاش التدوين نفحة ، لا سيدي التزام بعدد معيّن من التدوينات تُـخلُصْ عليهم كيما تحبّ بالكانزا و إلاّ بالشّهر و إلاّ كلّ تدوينة بحقّها و فمّة زادة منحة الإنتاج للّي يحربها بالتدوين ، و كان تزيد تنشر في الفايس بوك يعملولك سوم . و هاك الّي ما عندهمش مدوّنات و يدخلو باش يعلّقو بركة هاذوكم ينجّمو يُخلصُو بيجيسْتْ ، و هاك الّي مصنّفين هاذوكم خلاتْ عليهم شهاريهم تاقف حتّى يتبيّن / الخيط الأبيض من الخيط الأسود / نضجهم الفكري و مدى قدرتهم على التحليل هههههه ، و كلّ واحد يكتب باسم مجهول ياخذ تسبقة على الشهريّة حتّى يكمّل بطاقة عدد 3 للدّوسي متاعه ، و حتّى كي تبدا قزوردي و تجيبها قفّة و بندير ما عندك وين توصل لاهم باش يزيدوك في الشهريّة و لاك باش تولّي كاهية المدير متاع البلوغسفار رتّح دندانك و رَيّض اللّعب
.
أما ردّ بالك الشهريّة ماهاش مسَيّبة هكّاكة ، فيها قصَاصْ و أداءات . أهمّ حاجة ، يقصّولك للكنام باش كان واحد مرض و إلاّ مِكنُه عصَبْ مِلّي قاعد يتكتب و إلاّ حدِثله سقوط و طاح ما في عينه بَلّة في عركة افتراضيّة أهوك عنده تغطية صحيّة باش يداوي
.
و عمّار ، في عوض يقعد يكسّر في راسه و يحجب لك في مدوّنتك يولّي يبعثلك خطيّة ماليّة كي جمعيّات الكورة و كان تلمّ ثلاثة خطايا في العام ما يجدّدولكش الكنتراتو هههه آلاف يستنّاو في بلاصتك
زعمة كان جات الامور هكّة نتلهاو ببعضنا و إلاّ نتلهاو برواحنا و إلاّ ندورو على الاخرين ؟

6 commentaires:

لاعب النرد a dit…

آآآآ...ولادة يعش اختي
راك ما حكيتيش على النقابة متع البلوغسفير
شنو شهريات وزيادة وخطاياو كنام ... والنقابة وين مشت؟؟؟

WALLADA a dit…

لاعب النّرد

النقابة داخلة في هاك السؤال الأخير " لو كان جات الأمور هكّة زعمة نتلهاو ببعضنا والا برواحنا والا ندورو على لخرين " إفهمها وحدك عاد
يعني ناكلو في بعضنا و إلاّ كلّ واحد ما تهمّه كان روحه و إلاّ نتكتّلو ؟

برّا برّا هذاك علاش أنت باهي مع النّاس الكلّ ناوي عالنقابة متاع البلوغسفار ؟ هههههههههه

WALLADA a dit…
Ce commentaire a été supprimé par l'auteur.
Amin a dit…

Hors-sujet :
Le blogging PRO ça existe bel et bien !
اعمل طله هوني و شوف المدونين الفرنسيس قداش ايدخلو في الشهر
نصيحة صغيرة: رد بالك لا ادوخ

فلوووس

لاعب النرد a dit…

ههههههههههه...ـ هـ هيا نبدوا نحضروا للمؤتمرات متع النقابات الاساسية...فاش نستنوا؟؟؟ :)ـ

WALLADA a dit…

أمين

اللّهمّ لا حسد ، تي أحنا بلاش فلوس هههههههههه و هابطين ريش