في اليوم العالمي للاتصالات: مِنِّـكْ حريف و منِّـكْ خديمْ في دار بوه

البارح جاتني مكالمة على الجوّال متاعي ، واحد من شركة بلانات طيّبة الذّكر يزفّ لي في بُشرى ، كان سمعتوه كيفاش يتكلّم ؟ تقولو خلات ، هذه ربحت فيلاّ في بعض البقايع هاك الّي ما نراوهم كان في التلفزة ، " مبروك يا مدام ربحت معانا اشتراك مجّاني في الأنترنيت على المدّة الّي تحبّ عليها " / ياولدي كي سبّتك ؟ شنيّة الحكاية ؟ مثبّت روحك على قدّ ما نحبّ ؟ / " أي يا مدام القرعة طاحت على إسمك أنت/ جاب ربّي طاحت على إسمي بركة / باش تتمتّع باشتراك مجاني مدى الحياة كان تحبّ "
رزّنت روحي و قلت في قلبي يا ولادة هذه حكاية حيّ درابك و إذا المهبول ياكل ويبة العاقل ما يعطيهالوش ، جاوبت السيّد " أيا سيدي بابا إتحفني بهذيكة لكنْ العزيزة على خاطر كلّ شيء عندنا فيه لكنْ " هاهاهاها و جات لكن تتبختر ملفوفة في ورق سيلوفان مذخم مكتوب عليه اشتراك مجاني . " قتلك عاد يا مدام ، شركة بلانات تمتّعك بثلاثة شهر اشتراك بلاش على كلّ حريف جديد تقنعه أنت باش يشترك عندنا و إذا لقيت أربعة حرفاء يعني ثلاثة شهر في الأربعة يعني عندك عام بلاش ..." و كي نجيب عشرة و إلاّ خمسين حريف ؟ و أنا كي نعمل مجهودي و نجيبلكم إلّي تبقّى مالشعب التونسي مازال بلاش أنترنات ؟ أعمل عددهم في عدد الثلاثة شهر اشتراك مجاني ، موش يطلع شويّة عليّ مدى الحياة ؟ إمّالا نخلّيها ورثة لأحفاد حفادي إلى أن يرث الله الأرض و من عليها ، و إلاّ تعرفش كيفاش دخّلوني معاكم شريكة بالبايْ هههههههههه

ملاّ رْوَيَّـقْ و ملاّ قلّة احترام للمواطن ، توّا الحرفاء بكلّ شرائحهم و مستوياتهم تلقى فيهم المهندس و الطبيب و الأستاذ و الموظف و الطّالب إلخ باش يسيّبو حياتهم و خدمهم و مشاغلهم و يدورو يْساسِيوْ في صحابهم و معارفهم يعيّشك بربّي أعمل اشتراك في بلانات راني خوك ندبّرها في جرّتك ، توّا هذا ريق ؟ كي أحنا تاعبين في الماركتينغ و عقوبة الله في الإشهار و علوم التسويق علاش نتشعبطو و نتقوّاو على بدنّاتنا ؟