dimanche 17 mai 2009

في اليوم العالمي للاتصالات: مِنِّـكْ حريف و منِّـكْ خديمْ في دار بوه

البارح جاتني مكالمة على الجوّال متاعي ، واحد من شركة بلانات طيّبة الذّكر يزفّ لي في بُشرى ، كان سمعتوه كيفاش يتكلّم ؟ تقولو خلات ، هذه ربحت فيلاّ في بعض البقايع هاك الّي ما نراوهم كان في التلفزة ، " مبروك يا مدام ربحت معانا اشتراك مجّاني في الأنترنيت على المدّة الّي تحبّ عليها " / ياولدي كي سبّتك ؟ شنيّة الحكاية ؟ مثبّت روحك على قدّ ما نحبّ ؟ / " أي يا مدام القرعة طاحت على إسمك أنت/ جاب ربّي طاحت على إسمي بركة / باش تتمتّع باشتراك مجاني مدى الحياة كان تحبّ "
رزّنت روحي و قلت في قلبي يا ولادة هذه حكاية حيّ درابك و إذا المهبول ياكل ويبة العاقل ما يعطيهالوش ، جاوبت السيّد " أيا سيدي بابا إتحفني بهذيكة لكنْ العزيزة على خاطر كلّ شيء عندنا فيه لكنْ " هاهاهاها و جات لكن تتبختر ملفوفة في ورق سيلوفان مذخم مكتوب عليه اشتراك مجاني . " قتلك عاد يا مدام ، شركة بلانات تمتّعك بثلاثة شهر اشتراك بلاش على كلّ حريف جديد تقنعه أنت باش يشترك عندنا و إذا لقيت أربعة حرفاء يعني ثلاثة شهر في الأربعة يعني عندك عام بلاش ..." و كي نجيب عشرة و إلاّ خمسين حريف ؟ و أنا كي نعمل مجهودي و نجيبلكم إلّي تبقّى مالشعب التونسي مازال بلاش أنترنات ؟ أعمل عددهم في عدد الثلاثة شهر اشتراك مجاني ، موش يطلع شويّة عليّ مدى الحياة ؟ إمّالا نخلّيها ورثة لأحفاد حفادي إلى أن يرث الله الأرض و من عليها ، و إلاّ تعرفش كيفاش دخّلوني معاكم شريكة بالبايْ هههههههههه

ملاّ رْوَيَّـقْ و ملاّ قلّة احترام للمواطن ، توّا الحرفاء بكلّ شرائحهم و مستوياتهم تلقى فيهم المهندس و الطبيب و الأستاذ و الموظف و الطّالب إلخ باش يسيّبو حياتهم و خدمهم و مشاغلهم و يدورو يْساسِيوْ في صحابهم و معارفهم يعيّشك بربّي أعمل اشتراك في بلانات راني خوك ندبّرها في جرّتك ، توّا هذا ريق ؟ كي أحنا تاعبين في الماركتينغ و عقوبة الله في الإشهار و علوم التسويق علاش نتشعبطو و نتقوّاو على بدنّاتنا ؟


9 commentaires:

bent 3ayla a dit…

في هاذي بالذات نلوم عليك يا منية! توا هاذي فرصة و تتفلت؟ يا بنتي اشرط على تلامذتك ما يدخلو يعديو الامتحان كان ما يجيبولك ورقة اشتراك عند بلانات! دعاء الوالدين متاعهم حكاية اخرى عاد

اما بصراحة غلّبو عليا بالضحالة الاخلاقية و الفكرية و المستوى التعيس متاعهم

Anonyme a dit…

الحكاية هاذي معمول بيها في العالم الكل

mouaten a dit…

je confirme ce qu'a dit Anonyme

WALLADA a dit…

غير معرف و مواطن

توّا أنا ما نعرفش إلّي الشيء هذا صاير بيه في البلدان الكلّ؟ بالطبيعة موجود و لكن موجودة معاه التشجيعات و الحوافز و الخدمات الجيّدة موش تعطيني ثلاثة شهر بلاش تقصّ عليّ فيهم الأنترنات وقت الّي تحبّ و كي تبدا موجودة الدبي يبدا ضعيف و تناقض مصالح الشركة في خلاص الفاتورات و هات ماك اللاّوي

Houssein a dit…

Ce que t'as dit le M. au début, comme quoi tu as gagné un concours, est absolument ILLÉGAL, immoral, et ressemble plus a de l'arnaque qu'a du marketing.

A ta place je porterais plainte a l'Organisation
de la Défense du Consommateur

mouaten a dit…

@wallada
faut pas croire que je suis un représentant de planet, mais dans ton article t'as parlé de l'offre et non pas de la qualité du service
donc mon commentaire c'était sur ce que t'as écrit et non pas sur ce que tu pensais.
Avec tout le respect. :)

WALLADA a dit…

حسين

ماهاش مسابقة راهي و إنّما شكل متاع قرعة و هوما حاطّين موقع على ذمّة المشتركين عندهم و لكن إلّي يتّصلو بيهم هوما باش يعلموهم فقط

Kassus a dit…

Salut :) Je voudrais t'annoncer l'ouverture de notre site Tunisianet.com.tn.

Nous sommes spécialisés dans la vente en ligne de matériel informatique en Tunisie. Nous aimerions avoir l'avis de quelques blogueurs Tunisiens afin d'améliorer nos services.

Si tu veux, tu peux m'envoyer un message sur kais.turki ((at)) tunsianet.com.tn

Merci d'avance !

Nebyl a dit…

bonjour, c'est ta faute !! avec tout le respect que je te dois, c'est toi qui leurs a fourni ton N° de Tél perso, si tu révise le contrat que tu as signé avec Planet, tu vas trouver que tu as signé une close qui leurs permet de te contacter et de te communiquer leurs promos. si ce n'est pas le cas, tu peux réclamer auprès de Planet pour ne ¨plus etre dérangée sinon auprès de l'ODC

cdt.