نَـــــــــــشَـــــــــــــــــــــــازْ

ما ندّعيش أنّي مستويَّة أكثر من النّاس ، حتّى إنسان ماهو كامل و لكن فمّة وضعيّات متاع عَوَجْ صارخة و حالات يغيب فيها الذّوق ، و لو أنّه يلزمني تدوينة كاملة حول معنى الذّوق و مقاييسه و لكن حبّيت نعرض عليكم بعض الأوضاع إلّي ما معاهاش صبر .

قصعة بارابول فوق سطح دار خايخة قريب تطيح هاهاهاها

مُكيّف في بيت حيوطها مشققّة و كحلة بالنّدَى هوهوهوهو

فيلاّ مذخمة سورها مرَشَّق بالقزاز بخخخخخخخخخ

طاولة بلاّر و إينوكس على صالة من الموبيلية الكلاسيكيّة يععععععععععع

الآذان في رنّة الهاتف الجوّال خَرّررررررررررفْ

الحِجَاب مع الدّجين المظبوط و زينة الوجه ههههه وين تجي تنفع

سائق تاكسي يربرب و هو حالل إذاعة الزيتونة على علو صوتها أووووووووفففففففْ

واحد يشرب الخمر العام كامل لكن يبطّل في شهر رمضان باش يصوم أيْ لاَ قَدْقَدْ

واحد يخلط على جماعة في آخر هدرتهم و يعطي رايه في حديث ما حظرش عليه

و على بابا أوه

واحد يتشكَّى من ريحة الدخَّان و ما يقعد كان حذا الّي يتكيّفو لا نحبّك لا نصبر عليك

صغار موش لاقين الأدوات المدرسيّة و اللّباس اللاّيق و بوهم يتكّي على كبش قدّ البهيم قالّك سُنَّة

واحد يبدَى يحَرْبِطْ باش البارابول متاعه يجبد مئات القنوات و هو ما يتفرّج كان في إقرأ