مدوّنتي ماهاش وْتيل العَيَّاشي يا سي أبو العربي

توّة كالواحد يسمّيك في مدوّنته والا يصنّفك عنده بالباهي و إلاّ بالخايب الله غالب شيء خارج عن نطاقك لاك أنت حطّيت روحك و لا تنجّم تفسّخ إسم مدوّنتك ، لكن كي يوصل الدُمَّار أنّه واحد يهبط عندك لا طاحت لا دزّوها قال شنوّة هاني قارئ وفيّ و هو ما يحملكش في شربة الماء هذا الّي ينطبق عليه مثل " لا نحبّك لا نصبر عليك " هذا آش عمل سي أبو العربي

إسمع أبو العربي ، توّة قريب العام و أنا ندوّن كلمة أعوذ بالله ماجاتش بيني و بين أيّ مدوّن بمختلف اتّجاهاتهم الّي نتّفق معاهم و الّي ما نتّفقش ديما حرف القدر مهزوز بيناتنا ، لكن من مدّة شهرين والا أكثر و أنت ما تفلّتش حتّى تدوينة ليّ إلاّ و تخلّي لي تعليق تسمّعني فيه الكلام في بالك باش تصيبني بالإحباط و نبطّل التدوين ، حتّى الموديراسيون كيف عملتها موش تأثّرا بتعليقاتك و إنّما احتراما للمدوّنين إلّي يدخلو يقراولي و كلّهم ناس نقدّرهم و نحشم باش يقراو كلام سوقي في مدوّنتي ، هذا و البلوغسفار الكلّ شاهد و تدويناتي السّابقة الكلّ تشهد إنّي عمري ما ردّيت عليك لا بالقوّة و لا بالسّياسة و لا نهار تهجّمت عليك و لا جبدتّك و رغم هذا سيل الشتائم متاعك متواصل حتّى مَمَّاتي متوفّية عندها سنين ما سلمتش من لسانك و ما ردعتّكش الموت

.

و فاتك إنّي مانيش باش نتنرفز كيف براستوس و لا باش نتأثّر كيف آرتيكولي و لاني باش نقعد نلوّجلك على حلول كيف عيّاش ، أنا بكلّ هدوء و وسع بال و تسامح ديما نقول ربّي يهديه هذا الكلّ ما عليناش فيه ، و لكن تجي تستدعى روحك بروحك في مدوّنتي لا تشاور لا تناور لا قدّمت كلمة حلوّة لا قلت عفا الله عمّا سلف و هات نفتحو صفحة جديدة راني كثرت على ما وصّاوني بالكلام المرزي و أنت عمرك ما رجّعتلي كلمة ، هذا راهو ما يجيش

.

المعروف أنّه المدوّنة فضاء شخصي يعني كيما تقول أنت تابعتّك تكتب فيها ؟ تشطح ؟ تغنّي ؟ أنت حرّ كيما أنّك حرّ باش تستقبل في محلك إلّي يحترمك موش حمص و زبيب ، عاد يا أخي الخِربَة خِربتي و أنا حرّة شكون نضيّف فيها و شكون لا ، و ما عندي ضدّك حتّى شيء حتّى الكلام الّي قلتهولي الكلّ لم يحرّك شعرة من مفرقي ، نهارة الّي تعبّر على حسن نيّتك و تولّي تعليقاتك كيف خلق ربّي الكلّ تحترمني في شخصي و في أفكاري وقتها مرحبا بيك .