lundi 23 février 2009

مدوّنتي ماهاش وْتيل العَيَّاشي يا سي أبو العربي

توّة كالواحد يسمّيك في مدوّنته والا يصنّفك عنده بالباهي و إلاّ بالخايب الله غالب شيء خارج عن نطاقك لاك أنت حطّيت روحك و لا تنجّم تفسّخ إسم مدوّنتك ، لكن كي يوصل الدُمَّار أنّه واحد يهبط عندك لا طاحت لا دزّوها قال شنوّة هاني قارئ وفيّ و هو ما يحملكش في شربة الماء هذا الّي ينطبق عليه مثل " لا نحبّك لا نصبر عليك " هذا آش عمل سي أبو العربي
إسمع أبو العربي ، توّة قريب العام و أنا ندوّن كلمة أعوذ بالله ماجاتش بيني و بين أيّ مدوّن بمختلف اتّجاهاتهم الّي نتّفق معاهم و الّي ما نتّفقش ديما حرف القدر مهزوز بيناتنا ، لكن من مدّة شهرين والا أكثر و أنت ما تفلّتش حتّى تدوينة ليّ إلاّ و تخلّي لي تعليق تسمّعني فيه الكلام في بالك باش تصيبني بالإحباط و نبطّل التدوين ، حتّى الموديراسيون كيف عملتها موش تأثّرا بتعليقاتك و إنّما احتراما للمدوّنين إلّي يدخلو يقراولي و كلّهم ناس نقدّرهم و نحشم باش يقراو كلام سوقي في مدوّنتي ، هذا و البلوغسفار الكلّ شاهد و تدويناتي السّابقة الكلّ تشهد إنّي عمري ما ردّيت عليك لا بالقوّة و لا بالسّياسة و لا نهار تهجّمت عليك و لا جبدتّك و رغم هذا سيل الشتائم متاعك متواصل حتّى مَمَّاتي متوفّية عندها سنين ما سلمتش من لسانك و ما ردعتّكش الموت
.
و فاتك إنّي مانيش باش نتنرفز كيف براستوس و لا باش نتأثّر كيف آرتيكولي و لاني باش نقعد نلوّجلك على حلول كيف عيّاش ، أنا بكلّ هدوء و وسع بال و تسامح ديما نقول ربّي يهديه هذا الكلّ ما عليناش فيه ، و لكن تجي تستدعى روحك بروحك في مدوّنتي لا تشاور لا تناور لا قدّمت كلمة حلوّة لا قلت عفا الله عمّا سلف و هات نفتحو صفحة جديدة راني كثرت على ما وصّاوني بالكلام المرزي و أنت عمرك ما رجّعتلي كلمة ، هذا راهو ما يجيش
.
المعروف أنّه المدوّنة فضاء شخصي يعني كيما تقول أنت تابعتّك تكتب فيها ؟ تشطح ؟ تغنّي ؟ أنت حرّ كيما أنّك حرّ باش تستقبل في محلك إلّي يحترمك موش حمص و زبيب ، عاد يا أخي الخِربَة خِربتي و أنا حرّة شكون نضيّف فيها و شكون لا ، و ما عندي ضدّك حتّى شيء حتّى الكلام الّي قلتهولي الكلّ لم يحرّك شعرة من مفرقي ، نهارة الّي تعبّر على حسن نيّتك و تولّي تعليقاتك كيف خلق ربّي الكلّ تحترمني في شخصي و في أفكاري وقتها مرحبا بيك .

10 commentaires:

samsoum a dit…

Hors sujet: Tu sais que l'hotel Ayachi a ete mis en vente?

WALLADA a dit…

@ samsoum

je sais .

samsoum a dit…

Tawwa mouch Hors Sujet:

C peut être pour alors. l'hôtel est fermé et donc on vient squatter sur ton blog :)))

abu arabi a dit…

اذا هاذية برك شروطك...اممالا مرحبا بيا من تويكا

WALLADA a dit…

سمسوم

هكّة ظهرلك ؟ ههههههههههههه

Anonyme a dit…

يلزمو كل ليلة ياكل طريحه باش يجيه النوم اش نعملولو مسكين : مازو.

kacem a dit…

يا ولاّدة خليك ولاّدة

ماكنش نتوقّع إنك إتعنوني ...تدوينة بالطريقة هذه....بالعربي ما إنحبكشي تنزلي ...أكثر. خلي صورتك قي ذاكرة القراء تبقى هي هي ...هذا دفاع عليك
، على ولاّدة

WALLADA a dit…

قاســــم

شكرا لك

ART.ticuler a dit…

يا سي قاسم كان من الأجدر بيك كونك توجه كلامك لبول عربي مش ولادة!! شبيكم تسيبو المعتدي وتكبشو في المعتدى عليه؟؟ شبيه كيف الواحد يتسرق،تنساو السارق وتبداو تلومو فلي تسرق:اه ماحقكش تحط ستوشك في مكتوبك التالاني!!! والسارق يجري قدامكم!!!
كان من باب أولى واحرى أنك تمارس اختصاصك في الامر بالمعروف و النهي عن المنكر بطريقة صحيحة يا جنرالنا العزيز..
هذي قلتلهم taisez vous! !!
شكون عطاك صلوحية باش تصدر أوامر وتعطي أحكام قيمة؟؟؟ يظهرلي وقيت باش تفيق على روحك ..النهار طلع

WALLADA a dit…

المجهول الذي لم أنشر تعليقه

كائنا من كنت شكرا على تضامنك و لكن الجميع يعلم أنّي لا أنشر الشتائم على صفحة مدوّنتي ، أرجو أن تتفهّم الموقف

تحيّاتي