samedi 13 décembre 2008

يا حوحو وَصّلت الدَقّ للدّربَالة كي جيتني في أعزّ النّاس و قُتلِي اختار



حبّيت نعمل الّي اقترحه حسين رغم انّي احترمت فكرته و لقيت فيها ذكاء و حنكة نادرين في أيّامنا هذه لكنّ صدّقوني ما نجّمتش ، ما نجّمتش نختار و نقدّم مدوّنة على الأخرى . صارلي كيف الّي قالوله شكون تحبّ أكثر في أولادك
.
كلّ مدوّنات أصحابي ولاّت قطعة منّي نهار الّي يغيب واحد منهم الحسّ يبات ، نهار الّي واحد يقول ماعادش كاتب نحسّ قلبي يتخلع ، العام هذا الّي بديت فيه تجربة التدوين أحدث الفارق في حياتي الكلّها لأوّل مرّة نحسّ روحي حيّة نتفاعل نؤثّر و نتأثّر نشيخ و نتنفخ كي يشكروني و نتنبز كي يطفّيوني و نتنرفز كي واحد يقول كلمة موش في بقعتها و من بعد نرجع ننسى كلّ شيء ، تصليح الامتحانات مكوّم بحذايا و أنا ندوّن ، راسي يوجع و أنا ندوّن ، ناقصة نوم و نصبح نخدم و أنا ندوّن . نحسّ الّي ثمّة عايلة كبيرة نحكي معاها و تحكي معايا اليوم تحبّوني نختار منها البعض على حساب البعض ؟ ما نجّمش . قولو الّي تحبّو المرا عاطفيّة و أضعف من الرّاجل و صعيبة عليها المواقف ، ميسالش أما ما تنساوش المرا هذه من شيمتها الوفاء . الوفاء للمدوّنات الّي قريتلهم و حبّيتهم و احترمتهم و عملت عليهم كيف و فرهدوني في أحلك الأوقات و نوّرولي برشة ظلام و لهذا أنا ما نيش باش نصوّت أنا باش نذكرهم بالواحد من غير ترتيب

الدّوعاجي - أرابيكا – براستوس – آرتيكولي – خيل و ليل – عيّاش – ولد بيرصا – بوقرنين – ستوبور – المطرقة – قميرة – اللّص نومرو1 – عاشور النّاجي – شنفرى – الحلاّج – سفيان شورابي – خنوف – امرأة غبيّة – سمسوم – أبوناظم – هناني – زبراط – مصير – ماني الإفريقي – البيغ تراب بوي – كلندو – برباش – ملاّ فدّة - شهاب – قصّة أون لاين – إيما بانجي – جلال الغربي – تلفزة بالملوان – مانديلاّ ...
و يسامحوني إلّي نسيت ما ذكرتهمش الذّاكرة مع التعليم تتهلهل .
شفتو ماحلاها عايلتي ؟ سامحني يا حسين ما نجّمش نبجّل واحد على لاخر .صوّتو انتوما و أنا راضية بالنتيجة مادامت رغبة الأغلبيّة المتضامنة الّي لا تفرّقها فلوس و لا جوايز لأنّه الكلمة الأولى و لاخّرة لحريّة التعبير

13 commentaires:

ART.ticuler a dit…

ألف شكر ولادة إلي ما صنفتش المدونات..حقيقة شكرا..أكثر حاجة نكرها هي الترتيب الهرمي..وإلي فين نيمشو نلقاوه..في العائلة،في الدولة،في المدرسة،في العمل..وبطبيعة الحال في التصور الهرمي الديني..
أنا نقول إلي ما فماش مدونة أحسن من مدونة لكن فمة جملة تقالت في المدونة هذي بنينة برشة وفمة تصويرة رائعة في المدونة هاذي وفمة فكرة حلوة عند فلان ..وخلاصة القول إلي في كل مدونة طلعات وهبطات كيف جبل الشعانبي موش مسطحة كيف البحر الميت...وحديثنا قياس..
ثم من له الحق في الحكم على المدونات؟؟؟

تدوينتك هذي يا ولادة كلها صدق وأنا نقترح تعليقها في مدخل كل المدونات

L'AsNumberOne a dit…

Je suis d'accord avec toi. Je déteste la compétition et la concurrence, depuis toute petite ça a toujours été une phobie... alors on se contente de dire, j'aime, j'apprécie ou je déteste..
3lech lezem el 7ok weddok w chbih ghlebni, w bech 5ir menni?? Parce qu'on le veuille ou pas, la concurrence créent des tensions... alors restons amis!

WALLADA a dit…

آرت

اللّصّ

سعيدة جدّا بمشاطرتكم لي الرّأي يا أصدقائي

Sofiene Chourabi a dit…

لي الشرف أن أكو عضوا في عائلتك.

:)

WALLADA a dit…

Sofiène

tu es toujours le bien venu petit frère

ferrrrr a dit…

وانا؟

WALLADA a dit…

فرررر

أنت خويا و بابا و كتفي الّي نتسنّد عليه ، ما تغيرش من أصحابي عاد

ferrrrr a dit…

باهي دككوردو

ART.ticuler a dit…

يا فررر يا مغيار هههه

ferrrrr a dit…

يا آرت صح ليك، نهار سبت و انا عامل كعبات معناها طيب و انعدي كل شي، اما بجي نهار الاثنين

Mon Massir a dit…

Merci beaucoup. d'accord avec ce que tu dis.
Boussa.

ART.ticuler a dit…

بعد إذنك ولادة، إكتبت جملة من التدوينة متاعك في الصفحة الأولى من المدونة متاعي..شكرا

WALLADA a dit…

Massir

tu es la bien venue .

آرت

مثلك لا يستشير