dimanche 14 décembre 2008

اقـــتِــــــــــــــــــرَاحْ




تحبُّـو نحِـلُّـو اللّعبْ و نحرقو الفيلم الّي قاعِدْ يِتطبَخْ لنا في الكواليس باش يجيبونا على بَرَّة ؟ مانا ما نحبّوش الجمعيّات و كلّ ماهو مقنّن و رسمي و اخترنا باش يقعد الفضاء التدويني حرّ و هذيك هي فلسفته ، إيجَاوْ نبعثو مدوّنة جديدة جماعيّة على شاكلة مدوّنة " ضدّ الحجب " و إلاّ " مائة قصيدة للحريّة " و نسَمّيوْها / المدوّنة الوطنيّـة / و نشوفو وطنيّة شكون حامية أكثر و طنيّتنا أحنا و غيرتنا على هالبلاد و إلاّ وطنيّتهم هوما . و نكتبو فيها الكلّنا بصفة توَلّي تهبط كلّ يوم بمقال جديد إذا كان موش مرّتين ثلاثة في النّهار ، و خلّي عمّار يتلفّتلها نحلّو وحدة أخرى .
توّة برباش يصمّمها لنا و أحنا الكلّ بخلاف مدوّناتنا الّي يلزمها تقعد تخدم كالعادة و أكثر ، نكتبو في المدوّنة الوطنيّة كلّ ما يهمّ البلاد [ اقتصاد – سياسة – حقوق إنسان – تعليم – صحّة – دين – مسائل تتعلّق بالهويّة و الانتماء – إعلام – تشغيل – أحوال المجتمع ... ] و نسخّرو كلّ الطّرق : مقالات ، كاريكاتور ، لقطات فيديو ، صور ...
كي طلعت محَبّة تونس على المِـحَكّ هات نوَرّيوْ الوطنيّة على قاعدة و ماناش ناقصين كفاءات

ما تتسرّعوش في القرار ، فكّرو في عقلكم و إذا كان وافقتو أنا نقترح على صاحب مدوّنة " خيل و ليل " باش يتولّى بعث المدوّنة هذه على خاطره قيدومنا و أكبرنا في القدر و التجربة طبعا ، و على خاطر الوطنيّة الحقيقيّة علّمتنا ما نقصيش الّي دفع ضريبة وطنيّته غالية موش حَمّم وجهك و وَلّي وطني
هـذا اقتراحي و نتمنّــى يلقى عندكم القبـــــول

33 commentaires:

brastos a dit…

انا مع الفكرة كليّا .. و على اتم الاستعداد باش نشارك باللي نّجّم

و تو يبان الفرق ما بين وطنيّة الكراوك .. و وطنية "اهل بلدي" بالرسمي

titof a dit…

يا ولادة راو منستحقوش باش نثبتووطنيتنا
الي هيا من ثوابتنا و غير قابلة للمزايدة
خليهم يعوموبحرهم وانساوهم
وثاني حاجة هوما يسميو رواحهم الي يحبو
والا نرفضوهم على خاطر خيراتهم الساسية

ferrrrr a dit…

فكرة مدونة جماعية باهية و بناءة مستعد بش انشارك موش بش انوري وطنية ما حاجتي بوطنية اما بش الاستبداد ما يدخلشي للمساحات الكل على كيفو

WALLADA a dit…

تيتوف

أنا ما قلتش أنّنا مستحقّين باش نثبتو وطنيّتنا ، و لكن ما نخلّيوش مجال للمزايدات و التمثيل

و السّكات موش هو الحلّ ماهمش كمشة وليدات صغار يلعبو باش نسكتو عليهم و ناخذوهم على قدّ عقلهم ، اليوم وطنيّة كلّ واحد فينا تمسّت و الحلول السلبيّة القديمة ما عادش تجيب نتيجة

Tarek طارق a dit…

فكرة المدونة الجماعية فكرة متماشية مع إمكانيات البلوقوسفير و بالتالي نعتبرها في بلاصتها... ينجم يكونلها امتداد في الفايسبوك زادة... و بالتالي التنويع في البلاتفورم و هكاكة تنويع أساليب مرواغة الحجب...

أما بالنسبة للمحتوى و الأسباب فأنا عندي بعض الملاحظات... أولا أسلوب رد الفعل على مجموعة في الفايسبوك سمات روحها "المدونون الوطنيون" وب التالي الدخول معاها في مسابقة على تسمية الوطنية أسلوب يخضع لرد الفعل و مش للمبادرة و الاستيعاب... الأفضل وضع مبادرة من النوع هذا في سياق ماضي و تجربة البلوقوسفير بشكل عام لأنو جماعة المدونين "الوطنين" تخلقو البارح و ما يجيش يفرضو أجندتهم و مفرداتهم على بقية البلوقوسفير.. و بالتالي يلزم التعامل بهدوء في المستوى هذاية... خليهم هومة يفركحو

ثانيا يلزم يكون واضح حسب رايي إلي بقدر ما تكون مجموعة من نوع "المدونون الوطنيون" إقصائية على أسس سياسية فإنو من غير الحكمة و زادة مش من المبدئية إقصاء أي طرف آخر على أسس سياسية... فمة بعض "الدساترة" في البلوقوسفير ملي بدى... و بالرغم من تبنيهم رؤى معينة فإنهم كانو جزء من البلوقوسفير... يلزم الحذر في النقطة هذية و تجنب الشعارات الاقصائية

ثالثا نقترح أنها ما تكونش مدونة جماعية فحسب و إنما تكون "شبكة" للمدونين إلي يلتقوي بالأساس على مبدأ حرية التدوين بمعزل عن خلفياتهم الفكرية و السياسية... و بالتالي إطار قائم على أساس تطوعي.. ما يدعيش تمثيل حد لكن من حقو تمثيل ذاتو و الفكرة إلي قائم عليها يعني فكرة حرية التدوين... "شبكة المدونون التونسيين من أجل تدوين حر" مثلا تسمية مناسبة.. طبعا مش مهم التسمية المهم أصل الفكرة...

أخيرا نقترح فتح حوار موسع بين المدونين حول الموضوع خلال الأسبوع هذا... زادة يمكن كتابة نص يحط المبادرة هذية ضمن سياق معين يبني على الماضي و المبادرات السابقة بشكل يمس جميع المدونين إلي شاركو في المبادرات السابقة.. يعني ما يبنيش على القطيعة لكن على أساس التواصل مع تقاليد البلوقوسفير إلي إيجابية بشكل عام

Tarek طارق a dit…

إي حاجة أخرى يوم 25 ديسمبر يوم التدوينة البيضا ينجم يكون تاريخ الاعلان على الاطار هذاية... بما أنو يوم يرمز لتقاليد دفاع البلوقوسفير بكلو بدون أي خلفيات على مبدأ حرية التدوين

WALLADA a dit…

طارق

متّفقة معاك

mandela a dit…

ok ça marche...mais fo kon passe a laction...

mehdilad a dit…

Ce n'est pas question de mesurer wataniaat kol we7ed si tu fais un truc pareil c'est que derriere ca tu cherches à t'autosufire car tu le sais très bien y en a qui ont rien a foutre del wataniyyyaaa mais ceci ne prouve et ne tache en aucun cas leurs intégrité morale

abunadem marzouki a dit…

اقتراح معقول يا ولادة اما كيما قال طارق ما نطيحوش في ردود الفعل البافلوفية .ادم فكر في حكاية اخرى ممكن نستغلوها وهي نشرية في شكل مدونة هاهو يحضر فيها ينشر فيها كل ماهو جديد في المدونات التونسية .

Anonyme a dit…

فكرة ممتازة ولادة واقتراح طارق انو الاعلان عنها يتزامن مع يوم التدوينة البيضاء ما انجم كان نوافق عليه قلبا وقالبا

الحلاج الكافي a dit…

أنا مانحتكرش الوطنية لذاتي بالعكس كلما تظلام الدنيا أشك في كل شيء حتى في وطنيتي لكن اناأيضا ضدّ من يحتكر الوطنية خاصة من الجماعة هذومة ..ولاّدة انا مستعد نساهم من أجل حرية التعبير و النشر و الإعتراض و الممارسة المسؤولة و الغير مقيدة بضوابط الحاكم الذي يرى بعين عوراء

ART.ticuler a dit…

je suis pour l'idée et je partage le point de vue de Tarek

Sofiene Chourabi a dit…

في اطار التفاعل اليجابي مع مقترح أختنا ولادة أنا اقترح تحويل المجموعة الجماعية
http://www.facebook.com/inbox/readmessage.php?t=1063352147903&f=1&e=-12#/group.php?gid=66422435760
لاطار يجمع المشاركين في المدونة الوطنية

WALLADA a dit…

شكرا على التفاعل الإيجابي

بمثل هذا التكتّل لن يقدر علينا أحد

WALLADA a dit…

سفيان

اقتراحك مطروح على الأصدقاء المدوّنين الذين وافقوا على فكرة المدوّنة الجماعيّة و القرار للأغلبيّة ، خلّينا على الأقلّ نتارس الديمقراطيّة في فضائنا التدويني
شخصيّا لا أري ما يمنع فكرتك و لا تعارض بين اقتراحينا

ferrrrr a dit…

ولادة اللي اتقال الكل ايجابي على خاطر فيه مقترحات و صدق اما عندي بعض النقط الهامة نكتبها بطريقة منظمة و ننشرها للجميع اما الاكيد انو "الى الامام" ... باهي ياسر

ferrrrr a dit…

الفكرة جيدة و في وقتها اوافق المتدخلين في الخطوط العريضة ساجهز مادة مفصلة و انشرها غدا للجميع، و بما انك "القابلة" متاع الفكرة ابقى معاها حتى اتقصلها حبل الصرّة

Übermensch a dit…

برافو ولادة فكرة هايلة ياسر
نحب زادة نقترح تصميم لوغو كيما متاع ضد الحجب يكون مستوحى مالعلم التونسي فيه عبارة من نوع "أدون من أجل تونس" و إلا حاجة كيف هكة
اش قولكم؟

Stupeur a dit…

J'adhère +1

princessTanit a dit…

J'adhère à ton idée! Elle semble extrêmement enrichissante sur tous les points :)

HNANI a dit…

أنا انقول ما يلزمش تكون فمّا رد فعل فوري، و خاصة ما يلزمش تكون فمّا حساسية مفرطة ، و غضب لا مبرّر له لتسمية جماعة رواحها بالوطنيين، لأن الإسم ماهوش هو الأساس ، الأساس هو المحتوي، كيف مثلا واحد اسمو نزيه و تلقاه أخبث منو ما فمّاش، ولّا واحدة اسمها جميلة و هي المسكينة حاشا خليقة ربي
عاد ما تعطيوش الموضوع أكثر مما يستحق, و حكاية الفايس بوك فكرة باهية حسب رايي
بالله بالنسبة لحكاية الوطنية، راهو كل مجموعة عندها مفهومها للوطنية، مثلا يالنسبة ليا انسان وطني هو إلّى يخدم بلادو من موقعو من غير ما يطالب لا ببلاصة ولا بقطعة أرض و لا بقرض يهرب و ما يخلصوش
ناس خرين الوطنية عندهم تدبير الراس والنهب ، و قد ما يكون عندك قد ما تكون وطني
هيا يزيني

Zied El-Heni a dit…

فكرة جيّدة، وأنا مستعد للمساهة (على قدر الجهد).
أرجو أن تكون لينا بن مهني معنا في المشروع. فهي فتاة ممتازة، وطاقة محترمة، مكانها الطبيعي في ساحة البناء والفعل الخلاق.
وأملي كبير في أن تتجاوز خطأ البعض في حقها، وهي تعلم أنها أكبر من التعليقات المتسرعة

WALLADA a dit…

زياد الهاني

لينا بن مهنّي صديقة عزيزة علينا كلّنا و الّي يمسّها يمسّنا

Eros a dit…

Beau projet! j'adhere aussi.

البرباش a dit…

فكرة هايلة ولاّدة... هاني معاكم على طول الخط

Unknown a dit…

ياخي الوطنية ولاة محلّ مزايدة هذي أخر طلعة من طلعات السماسرة الجدد متاع النظال على كلّ حال أنا مستعد نشارك في المدوّنة الجماعية وهي فكرة ممتازة

Bel Malwene a dit…

Fekra ray3a wallada !! j'adhère a 100% ... merci.

Tarek طارق a dit…

يلزم تفعيل الاقتراح هذا توة و عدم الانتظار أكثر... يلزم المبادرة بتأسيس المدونة الجماعية و فكرة "الشبكة" متاع المدونين بما أنو عليها توافق كبير بين المدونين

WALLADA a dit…

طارق

المدوّنة حضرت و بإخراج جميل إنشاللّه ذوقي يعجبكم ، غدوة ولاّ بعده نعرضها عليكم الكلّ كان عندكم اقتراحات أو إضافات و من بعد أزواو أو برباش يبعثولكم دعوات للانضمام لقائمة المدوّنين فيها على خاطر أنا ما نملكش عناوين بريدكم الإلكتروني كلّكم

kmr a dit…

après une longue absence de la blogosphère, je ne peux réver d'un meilleur retour que celui que tu propose: j'adhère totalement, et je te remercie pour le génie de ton idée.

WALLADA a dit…

@ kmr

bon retour et merci

MOmo a dit…

JE suis avec vous ,bonne idée.