مِـنْ غيــر غـُــشْ

ناس بكري يقولو " الشتا شِدَّة و الرّبيع منام و الصّيف ضيف و الخريف هو العام "
أنا المقولة هذه لقيتها تنطبق على البلوغسفار بعبادها بمواضيعها بجوّها الكلّ و عملت فيها قراءة ، من غير ما يتغشّش حدّ راني ماني نقصد في حتّى حدّ بذاته و لاني نعمل في تصويرة قاتمة ، أما هكّاكة خواطر تدور في راسي يلزمني نقولها و إلاّ نكتبها باش يقعد الموطور لاباس .

يا سيدي أنا دخلت للمعمعة في ربيع عمناول . كيفاش دخلت ؟ كيفاش كتبت ؟ كيفاش تفاعلت و عرفت النّاس ؟ كيفاش اطّنبجت كالبوجادي في بعض العباد قبل ما نعرفهم بالقدا ؟ منــــامـــة

جا الصّيف ، تعدَّى رمشة عين بين الخرجات و السّهريّات حتّى الّي يكتب يبدا فادد من السّخانة و يدادي عالخروج ، يكتب حويجة خفيفة و يسلّم على الجماعة و يتعدّى ما عندوش وقت للنّقاش و التّحليل الواحد ممروج خُلقِي شكون ها الّي باش يترَصّ في الدّار عروقاته شرتِلَّة و السّخانة تشوشط فيه و هو قدّام الارديناتور فاش يعمل؟ يدوّن .

هيّا جا الخريف و تحرّكت اسبابها ، رجعت العباد من الكونجيات شدّهم من خشمهم تطلع روحهم و رجع المكتب و جا رمضان مسلسل افتراضي تشنشين و تصنيف و ناس تجِدْبِتْ مع المواضيع الدينيّة و ناس فادّة تستنَّى في تنفيسة العيد ، و رجعنا نسلّمو على بعضنا كيفِنِّـكْ شنيّة حوالك ، و زادو بعض المدوّنات تحجبو في الخريف تضامنَّا معاهم و تعدَّى الخريف .

كي جا الشتا قلنا توّة تريض العباد في ديارها و يحصرهم البرد و يتلفّتو للكتيبة و يقدّمو الإضافة ، ياخي تحلّ طُرْح قراش تقول بطحة نطيح في الحلفاوين . زيد جات أحداث غزّة و عوينتك ما ترى سَوْ ، و قبل ما توفى الحرب في غزّة كانت البلوغسفار خلا و قفار ، إلّي سكت و الّي غاب و الّي سكّر الحانوت و الّي يحكي في أموره و الّي عاف التدوين و الّي حالته النفسيّة ما تسمحش ... كلّ يوم ندخل نقول خلّي نفقد هاك الاولاد شعاملين نلقى روحي في واد غير ذي زرع ، شويّة مناوشات من هوني ، شويّة جبدان شبوك من غادي ، برشة سَبَّان من غاديكَ ، حتّى الّي يحبّ ينَظِّرْ هكّة و تسَوِّله نفسه باش يكتب حويجة جادّة ياكله الحافر عقّدتنا يا سي كْرُمْبَة

.
جاب ربّي فمّة ديما استثناءات و ناس شادّة صحيح في الكلمة الحرّة و المعنى الجميل والا رانا بحِرْنا .

ما كذبوش ناس بكري كي قالو الشتـا شِـدَّة .