vendredi 23 janvier 2009

مِـنْ غيــر غـُــشْ




ناس بكري يقولو " الشتا شِدَّة و الرّبيع منام و الصّيف ضيف و الخريف هو العام "
أنا المقولة هذه لقيتها تنطبق على البلوغسفار بعبادها بمواضيعها بجوّها الكلّ و عملت فيها قراءة ، من غير ما يتغشّش حدّ راني ماني نقصد في حتّى حدّ بذاته و لاني نعمل في تصويرة قاتمة ، أما هكّاكة خواطر تدور في راسي يلزمني نقولها و إلاّ نكتبها باش يقعد الموطور لاباس .

يا سيدي أنا دخلت للمعمعة في ربيع عمناول . كيفاش دخلت ؟ كيفاش كتبت ؟ كيفاش تفاعلت و عرفت النّاس ؟ كيفاش اطّنبجت كالبوجادي في بعض العباد قبل ما نعرفهم بالقدا ؟ منــــامـــة

جا الصّيف ، تعدَّى رمشة عين بين الخرجات و السّهريّات حتّى الّي يكتب يبدا فادد من السّخانة و يدادي عالخروج ، يكتب حويجة خفيفة و يسلّم على الجماعة و يتعدّى ما عندوش وقت للنّقاش و التّحليل الواحد ممروج خُلقِي شكون ها الّي باش يترَصّ في الدّار عروقاته شرتِلَّة و السّخانة تشوشط فيه و هو قدّام الارديناتور فاش يعمل؟ يدوّن .

هيّا جا الخريف و تحرّكت اسبابها ، رجعت العباد من الكونجيات شدّهم من خشمهم تطلع روحهم و رجع المكتب و جا رمضان مسلسل افتراضي تشنشين و تصنيف و ناس تجِدْبِتْ مع المواضيع الدينيّة و ناس فادّة تستنَّى في تنفيسة العيد ، و رجعنا نسلّمو على بعضنا كيفِنِّـكْ شنيّة حوالك ، و زادو بعض المدوّنات تحجبو في الخريف تضامنَّا معاهم و تعدَّى الخريف .

كي جا الشتا قلنا توّة تريض العباد في ديارها و يحصرهم البرد و يتلفّتو للكتيبة و يقدّمو الإضافة ، ياخي تحلّ طُرْح قراش تقول بطحة نطيح في الحلفاوين . زيد جات أحداث غزّة و عوينتك ما ترى سَوْ ، و قبل ما توفى الحرب في غزّة كانت البلوغسفار خلا و قفار ، إلّي سكت و الّي غاب و الّي سكّر الحانوت و الّي يحكي في أموره و الّي عاف التدوين و الّي حالته النفسيّة ما تسمحش ... كلّ يوم ندخل نقول خلّي نفقد هاك الاولاد شعاملين نلقى روحي في واد غير ذي زرع ، شويّة مناوشات من هوني ، شويّة جبدان شبوك من غادي ، برشة سَبَّان من غاديكَ ، حتّى الّي يحبّ ينَظِّرْ هكّة و تسَوِّله نفسه باش يكتب حويجة جادّة ياكله الحافر عقّدتنا يا سي كْرُمْبَة
.
جاب ربّي فمّة ديما استثناءات و ناس شادّة صحيح في الكلمة الحرّة و المعنى الجميل والا رانا بحِرْنا .
ما كذبوش ناس بكري كي قالو الشتـا شِـدَّة .

9 commentaires:

Anonyme a dit…

C'est beau :)

WALLADA a dit…

@ Khanouff

Merci

البرباش a dit…

و علاه الغش مادامو كلامك منطقي و معقول و يلخص اللي قاعد صاير...

أحنا مثلا في الرديون، من قبل الصيف اللي فات (من قبل ما يعرّس القوفرنور) و أحنا نحبوا نتلموا و نعملوا قعيدة و لتو لا حب ربي يسهّل، ديمة المشاغل خانقتنا و موش مخليتنا نجتمعوا كيف ما قبل

حالة و تو تمشي على روحها... و لا بدّ لليل ان ينجلي

bacchus a dit…

شكرا ولادة على المواضيع المقترحة فعلا فالموضوع في حاجة إلى النقاش ولكن هل يسأل المدوّن نفسه لماذا يدوّن؟ المشكلة احيانا هي ضبابية الهدف أو انعدامه أحيانا بالنسبة إلى البعض ممّا يفتح المجال إلى الكسل أو الصدفة أو سد الفراغ أو تفريغ شحنة غضبية أو استفزاز أو غير ذلك من الدوافع التي تذوب مع الزّمن بل قد تكون أسباب اخرى بل أكيد وجودها . صحيح ان البعض يعلن عن أهدافه في صفحة مدوّنته الأولى ولكنّ المشكلة أنّ البعض لا يراجع مواقفه رغم تراكم التجارب وذلك هو الخطر أن لا يتعلّم الانسان من تجاربه أو هو يوهم بوضع اهداف لا يسعى إلى تحقيقها وعندها يا خيبة المسعى فلماذا لا يكتب كلّ مدوّن نصا يجيب فيه عن سؤالين: لماذا أدون وما هي افق انتظاري من التدوين؟

WALLADA a dit…

باخوس

لماذا ندوّن ؟ سؤال كنت قد كتبتُ فيه تدوينة من ثلاثة أجزاء في شهر جويلية إليك الرّابط
http://myblog-wallada.blogspot.com/2008/08/blog-post_10.html


tu refais le même lien et tu ne change que le dernier chiffre , alors le dexieme post c'est 2.html et le troisième c'est 3.html

cactussa a dit…

c'est vrai ca kol mara nji ntol nohrob!!!ca fait modda wil we7id ma3adich 3inou ydawin en plus on reagit plus comme avant sur tnblogs ,le respect de la difference des idées de la vie et des points de vus de lautre est en voix de disparition!!

cactussa a dit…

malheureusement tous ca est vrai et quen plus il y a de plus en plus un manque de respect de la difference de point de vue entre nous les blogeurs !!meme ici le manque de liberté existe mais en plus c'est les blogeurs eux meme qui l'ont creé.

Anonyme a dit…

@ bacchus
كلامك فيه برشة صحة لكن أعتقد انو في حاجة إلى بعض التروشيك :
المشكل ليس فيما ينتظره المدون بل فيما لا ينتظره !! كأن يتجاوز التعليق موضوع التدوينة إلى شخص المدون
المشكل هو الخلط المتعمد بين الهجوم على فكرة والتهجم على الشخص المشكل هو مستوى التعاليق إلي قليلا ما ترتقي إلى مستوى التدوينة ما يعطي إحساس بالاحباط ..
شكرا ولادة على اثارت الموضوع
Ex-modawen :-)

Anonyme a dit…

عفوا إثارة وليس اثارت :-) الكلو من بروغرام يملي إلي نكتب بيه ..