الإرهابْ اللّفظي لن يثنينـي عن التدوين

تقول صليحة يرحمها في كلمة " تحدث عالعبد ساعات شيْ الذي لا يوَالمْ " الإنسان موش ديما في صحنه و مستعدّ باش يكتب ساعات تمنعه حالته الذهنيّة و النفسيّة و ظروفه الاجتماعيّة . و على خاطر الكتابة عندها طقوسها و غزارة الأفكار أو عقمها شيْ موش بيدينا ، تجي فترات نتوقف على التدوين و لكن نقعد نتبّع في إنتاج الأصدقاء و نقرى التعاليق الكلّ و كلّ يوم يتعدَّى ما نكتبش فيه نحسّ روحي بعدت أكثر

.
كي تشوف الفضاء التدويني من برَّه غير أنّك تكون طرف فيه ، كي تتفرّج على الخنَّارْ و السَبَّانْ و القذف و ترى البعض الّي انقطعو على التدوين و عَافوه و البعض الّي ما عندهم لا صنعة لا صنيع غير يعلّقو عند هذا و لاخر و يتفنُّو في اللّفظ البذيء ، تقول ساعات أنا وين كنت ؟ يصيرلك كيف الّي ما يفطن بتأثير الشُّرب كان كي يخلط على أصحابه بعد ساعتين وقتها يرى الحالة الّي هوما فيها .

نعرف أنّه البلوغسفار صورة مصغّرة على المجتمع بكلّ ألوانه و خصوصا بثقافة البذاءة الّي فيه ، هذاك علاش نرَى في حضور المدوّنات السيّدات يتقلّص كمًّا و خاصّة نوعًا . إلّي تهزّ راسها باش تكتب بنِدّيَّة و نضج توَلِّي تقلّق يلزمنا نِتلهَاوْ بيها نفَدُّوها و كان لزم نمرّضوها باعصابها مَاهِي خليقة ضعيفة مَهيضَة الجناح ، أكاهُوْ ندُورُولها عالحانفي حتّى تهجّ و إلاّ ترجع لحَجْمها الّي سطّرناهولها توّه قرون ، ترجع تزيّن البلوغسفير بحضورها الشرفي أما ترُدّ بَالها لا تدخل في معامع الرّجال و تجبد عالدّين و إلاّ السّياسة و الحاجات الصّعيبة على عقلها النّاقص

حيلة قديمة باش نقصِيوْ المرَا من كلّ فضاء تحاول تبرز فيه و تأكّد شراكتها و جديّتها

.
أنا نرفض باش ندخل بَبُّوشتي و نحوّل مدوّنتي لَقشَة من حِصَّة المرأة تحكي على التريكو و اللّحمَة المَحشيَّة بالفزدق ، نرفض نزيّن صفحة مدوّنتي بالنَوَّارْ و العصافر و تصاور المغنّين و العالم مَاكِلْ بعْضُه ، نرفض نتقَوْقَعْ و نخَافْ نعَبَّرْ عَلّي نحِبْ لَيِتقَـبَّحْ فيَّ واحد و يكتبلي تعليق جارح و محرج .

نْحِبْ نقول لكلّ الّي عاملين فيها ذراعهم في وجوههم و سلاحهم الكلمة النّابيَة رَاهُو سلاح حَافِي ، صحيح يكدّر الخواطر خاصّة للّي نفوسهم نقيّة و حسَّاسة و لكن يدور يدور و يرجع في وجه مولاه على خاطر كلمة العيب تِنْـبِي على مستوى قايلها

.
هذا كلام قلته من أوّل ما بديت ندوّن يا عبَادْ أنْقدُو الأفكار و سَيّبُو أصحابها ، شنوّه الرّيق هذا يالّي بيك يالّي عليك و لاخرْ شايِخْ كيفاش كان مهبّل النّاس و فِرْحَااااااااااانْ إلّي انتحَلْ أسماء المدوّنين أخرين باش يسِبّ و يقول الّي يحِبْ ... تلزُّونا نقولو عربي و عطاه سيده حصانْ ؟ علاش كلّ ما نقدّمو شويّة يجي شكون ينَكِّسْ بينا بالتوَالِي ؟ أما رغم هذا الكلّ أنا قاعدة و ما زلت نكتب ما دام مخّي مازال يفكّر