jeudi 3 juillet 2008

يا هَوَى الأحْلامْ يا عَزَّة

الغرام في الدمِّ سارِحْ
و الهَوَى طارِحْ مَعَزّة
و الحنين للقرب بارِحْ و النَّوَى جارح يا عزَّة
يا ابتسامة فجر هلّت
بدّلت ليلي الحزينْ
يا ندى الصّبح الِّي سَأسَأ
فوق خدودي الدَّبلانين
بَلِّ شوقهم
صَحَّى لون الورد فوقهم
كلّ خدّ وَشَمْلُو وردة مِينْ يدُوقهم
غيرك أنتِ و مين سِواكِ
يا حياتي يا مَلاكِي
يا نسيم الحبّ لمّا هَبّ هَزِّ القلب هَزَّة
يا هَوَى الأحلامْ يا عَزَّة
اللِّيلة دِي جُمْ خَدوني يا ملاكي
جُوزْ تَنَابْلة و نصِّ دَسْتَة من التِّيرانْ
كنت بَآحْلَمْ يا حبيبتي
كنت بآحلَم بيكِ أنتِ
كنَّا أنا و أنتِ قالْ في جنينة خَضْرَة
و محَاوِطْها البُرْتقال
و أنتِ جُوَّة قرُنْفلاَيَا بالعَبِيرْ بِتِسْتِحَمِّي
أجْرِي يَمِّكْ تِسْبَقيني
و تِجْرِي يَمِّي أحْضُنِكْ
و اشْرَبْ عَبيرِكْ من شَفايْفِكْ
و الغصون واقفة و شايْفَة
بِترَاعينا بَسِّ خايْفة
مِالعُيُونْ و العيون بتقول كلامْ
و الكلامْ طايِرْ حَمَامْ
بِينادينا بالأغاني و يهادِينا بالسَّلامْ
كُنت بَآحْلَمْ يا حبيبتي
كنت بآحلم بِيكِ أنتِ
أيْوَة أنتِ و مينْ سِواكِ
يا حياتي يا مَلاَكِي
يا نسيم الحبّ لمّا هَبِّ
هزِّ القلب هزَّة يا هوَى الأحلامْ يا عَزَّة
و انطلق في الجوِّ فجأة
يا حبيبتي صوت مفاجأة
صوت يخَلِّي الدمِّ يجمَدْ
" إصْحَ يا احْمَدْ "
و انتهى الحلم الجميل
و ابتدأ الهمِّ التقيل
" فين إمَامْ "
إنتو مِينْ
" إحنا ناس مُكَلَّفينْ
تيجِي سَالِكْ مُش حَتِتعَبْ
و احنا بَرْدُه مَعذورينْ"
إنْتو دُودْ الأرض و الآفَة المُخيفَة
إنتو ذَرِّة رَمْل في عنين الخَليفَة
إنتو كُرْبَاجْ المَظالم و المَآسي
إنتو عِلّة في جسم بَلدِي
إنتو جيفَة
"سَكِّتُوهْ بْنِ الكِلابْ سَفِّفوهْ منِ التّرابْ
فتِّشوا كلِّ الأماكن
طَلّعُوا رفوف الدُّولابْ "
كَمِّمُوني يا حبيبتي، فتِّشوني يا حبيبتي
كلّ شعْرَة في جسمي بالعِينْ فتِّشوها
المِخَدَّة مِنْ جنانهم شرَّحُوها
و انتهَى التفتيش ما فيشْ
سَدَّقيني ما تخَافيشْ
هُوَ في عندي يا عَزَّة مَمْنوعَاتْ
غير بَحِبِّ النّاسْ و بَكْرَهْ السُّكَاتْ
بَصِّ واحد مِالتَّنَابْلة جُوَّة عينِي
و أنتِ عارفَة عنَيَّ صافية و طيِّبِينْ
زَيِّ كلّ عيون بلدْنا يا حبيبتي
شبَّاكِينْ عَالقلبِ دُغرِي موَصِّلينْ
كان مُنَاهْ يِلمَحْ علامِة خوف بَسيطَة
طَبْ حَيِيجِي الخوف منينْ إبنِ العَبِيطَة
هُوَ مِينْ فينا الجَبَانْ
ولاَّ مينْ فينا الّي خَانْ
هو بَص في عيني بَصَّة
و اترَعَبْ و خاف و قالْ
جملتين مُشْ مفهومينْ
أصْلُه شافْ صُورتينْ جُمَالْ
في العيون الطيِّبينْ
مَصْر في العينْ الشِّمال
وأنتِ في العين اليمينْ
أيْوَة أنتِ و مينْ سِوَاكِ
يا حياتي يا ملاكي
يا نسيم الحبّ لمّا هبِّ هَزِّ القلب هَزَّة
يا هَوَى الأحلامْ يا عَزَّة

أحــمد فـؤاد نـــجم

2 commentaires:

أرابيـكا a dit…

اه يا أبو النجوم ...جنة عدن اللغة ...شكرا لهذا القصيد

WALLADA a dit…

أرابيكا

سعيدة بمرورك و أسْعَد لأنّ اختياري نال استحسانك
مع ودّؤي الصّادق