طرائف حقيقيَّة من داخل الأقسام

دخلت أستاذة جديدة و صغيرة لقسم متاع جماعة مكـَرّطِين هاكِلّي العام يعدِّيْو فيه ثلاثة سنين و عازقينو بيمِينْ باش يهبّلو الأستاذ الِّي يجيهم و هيَ مسكينة حازقة روحها و ما تتكلـِّم كان بالفصحَى ، أيا سيدي خذات دفتر المناداة هاكِلـِّي التلامذة غيّرُوا أساميهم فيه و بدات تسَمِّي

محمّد بن عبد اللّه

حاضر ، مَدَامْ

أبُو بكر بن قحافة

حاضر

بِهتِتْ الطـُّفلة ،هذه الكلـّها مُصادفة؟ كذبِتْ و نَسَّاتْ و كمّْلِت المناداة

عمر بن الخطَّابْ

حاضِرْ

عثمان بن عفـَّانْ

حاضِرْ

هِبْلِتْ ، و ما عادش تنجِّمْ تخبِّي التعجّب متاعها قالت : رَبَّـاهْ

نطَقِلـْهَا تلميذ من آخر القسم و قالِلها : مَنْ يُنَادِينِي ؟

-------------------------------------------------------------------

أستاذ متاع تربية إسلاميّة جاه المتفقـِّد في آخِرْ شهر مايْ بعد ما كمِّل البرنامج و مازالت كان الامتحانات التأليفيّة و ما عادْ ما يِتقـَرَّا ، غـَزِّلْ و مِكْنُو العصَبْ . قالو المتفقد : ميسالش قـَرِّي أيْ درس مِالدرُوس الأخيرة ، أيا تفرْهِدْ و زيدْ مِطمَانْ إلِّي تلامِذتـُو فاهمِينْ كل شيء

هوَ يفسِّرْ و مِتخَمَّرْ و جَايِبْ ما عَندُو و يِلعِجْ عليه تِلميذ بسؤال متاع واحد ما قرَا شيء

قالو : سيدي ، ما هُوَ الإسْلامْ

إيْ هاك الأستاذ خرجت كشاكشو و طلعتلو الكلبة بنت الكلب و قالو

الإسلام هو دينك و دين بوك و دين والدَيَّ أنا و دين والدين المتفقد و الوزير الّي حطِّك تقرا عندي

-----------------------------------------------------------------

أستاذ تاريخ يقرِّي على مصر الفرعونيَّة ، بعد ما كمِّل الدَّرس خَبَّا الخريطة باش يربِّي عند التلامذة الذاكرة البصريَّة و سألهم : أينَ تقعُ مصر الفرعونيَّة ؟ جاوبُو تلميذ

لا ، لـَمْ تَقـَعْ مصر الفرعونِيَّة