mardi 16 septembre 2008

أبْناء لمَنْ لا أبْناءَ له...ربِّي يفضّللنا الكـْنـَامْ

في أوّل نهار خدمة من هالعام الدّراسي الجديد تسَلـّمنا بطاقات العلاج متاعنا إلـِّي بعثها صندوق التأمين على المرض أو ما يعبّرو عليه بالكنَامْ . و بدَا الضّحك ، أما مَلاّ كنامْ يا سيدي نظام و استخدام مُحْكم للإعلاميّة ، شيْ هبَال . هيَ لا مَحَالة يعطيها الصحّة جابتلنا ضحْكة عالصّباح و زيد كيما يقولو اجتهدَتْ و لمْ تـُصِبْ أما يا ذنوبي كان تصَوِّرْ فيها حتّى ربُعْ أجْر

يا سيدي

زميل ليَّ مازال عازب طلع عنده ثلاثة ولاد ، ضحك و قال مافي باليش ولاّو يفرّقو فيهم هكّاكة هناني بناني ، أيْ ماوْ يشاوروني عالأقلّ راني اخترتهم في وجوهم الضّوْ موش كي رَهطِي أنا

زميلة أخرى عندها زوَيِّزْ وليدات الكنام زادِتـْها الثالث راجلها قال لها و هو يفدلك : بتذاكري من وَرَايَ؟

و زميلة أخرَى طلع عندها ولد أما مازال ما تولدْشْ ، مكتوب: فلان الفولاني تاريخ الولادة 2010 و هي ولدها من مواليد 2001 ، شكان عليه غلطة صغيّرة بين الواحد و الصّفر

هذا بخلاف إلّي نكرُوه في مَرته و صغيّراته و رَجّعوه عازبْ بعد ما حَطّ نـَهْد كِبْدُه باش عَرّسْ و جَابِ الصّغارْ و الـِّي رَدُّوه هَجَّالْ على كيفهم ... و بَرَّه عادْ آشْ يصلّحهم و يعاوِدْ يرجَّعهم و مِنـَّا لوَقتها يلزم ما يمرض حَدّ


الحَاصِلْ تـَحْيَـا الإعْلاميَّة في الإدارة التونسيّة

7 commentaires:

ولد بيرسا a dit…

ههههههههه
و الله هايلة ها الكنام
الواحد يدبّرولو صغير و الاّ اثنين، هكّاكا، بو بلاش
لا حبالة، لا وحم، لا مصروف لا زمّارة
مشروع ماهوش دوني بالكلّ
:-)))))))))

HNANI a dit…

هههههه ماني مرّة حكيتلكم على زميلي ييغلى جاني للبيرو و قالي برّا شوف روحك قدّاش عندك صغار هههه على خاطرو طلع عندو بنية و هو عندو كان الذكورة ههه
عاد كان خايف من مرتو لاتفيق بالدفتر قبل ما يمشي يصححو و اترصيبو في مشكلة ههه

Anonyme a dit…

شيء كبير هذا يولى الواحد خايف لا يبدى من تحت يدين الكنام يطلع عندو عايلة اخرى موازية للعايلة متاعو وما في بالوش اما طلع عندنا زنس هوة رقمية تعمل الكيف

Khanouff a dit…

:))
http://tnkhanouff.hautetfort.com/

WALLADA a dit…

أصدقائي إلّي شرّفوني بالزيارة

ردُّوا بالكم و ثبّتو في كوارتطم لا تطلعوا جايبين أولاد أخرين في المنام
ههههههههههههههه

Anonyme a dit…

توا فهمت وعرفت الحل متع التشنشينة السابقة:الحامل والمحمول ههههة!

Adem Salhi a dit…

hathi il bidaya ou mazal mazal
:d