vendredi 19 septembre 2008

قـُلدَمَايرْ جديدَة ... عَندنـَاشْ أحْنا حتـَّى ربُعْ الكاهْنـَة ؟


قـُلـْـدَمَايـِـرْ جديدة ... إيْ شبيه ؟

ما نيش باش نحكي في الشأن الإسرائيلي ، ولكن الشيء إلـِّي استوقفني هو موقف بعض العرب من تسلّم مْرَا رئاسة الوزراء في إسرائيل . موقف أقلّ ما يتقال فيه أنّه يسخـِّف ، قالـِّك قـُلدَمَايِرْ جديدة ، إيْ بَاهِي ، هَايْ طلعت و بدات تشكـِّل في حكومتها و تخطّط للعرب إلّي ما زعامْ كان يلقـّطـُو في الأخبار و يبنيوْ عليها أوْهام من عندهم و ما فمّة حتّى فعل ملموس
إسرائيل طلّعت مْرَا على رأس الحكومة ، و أمريكا عندها وزيرة خارجيّة وين تحدّلنا ناقفو و موش لازم نذكر بقيّة دول العالم المتقدّم ، و أحنا شعملنا ؟ رئيسة الوزراء الوحيدة إلـِّي كانت عندنا قتلناها و تمشكات قضيّة اغتيالها و كأنّ شيئا لم يكنْ و هوني نحكي على بينازير بُوتـُو

فمّة شكون قالـِّي مرَّة "علاش تتذكّر في الـِّي فات الماضي مشى مع الماضى" لمعلوماتك يا سيّدي العزيز إلـِّي الغرب عمره ما نسى ماضيه و النّاس إلّي خدمت تاريخه و اليهود لتوّة يتفكّرو تشرّدهم بين البلدان و الشخصيّات الأولى إلّي أسّست كيانهم . وقت إلِّي الغرب يعظّم في أعلامه و علماءه و رجال السّياسة متاعه و القادة و المخترعين و الفنّانين ، أحنا مازالت شوارعنا و نهوجاتنا و الأقسام في مكاتبنا و جامعاتنا بالأرقام ، نوَامِرْ ... و كأنّه ما عندناش ماضي و إلاّ على خاطر ماضينا أحنا إلِّي هدّيناه و حرقناه و قتلناه كيمَا تحرقت كتب إبن رُشد و كيما تقتلت الكاهنة البربريّة و كيما تهدّت برشة عوالم جميلة تحت ألف تعلّة و تعلّة .

هو الفايدة في مْرَا تمشّي في أمور الحكم في الكواليس كيفما جات لا جات و السّلام ؟ لا ، هاذم نساء خذاوْ على عاتقهم سياسة البلاد ، هوما إلّي في الصّورة ، يخدمو في الموارد و العلاقات الخارجيّة متاع بلدانهم و كلّ غلطة محسوبة و نهارة الّي توفى مهمّة واحدة منهم ترجع لبُرْتمانها القديم و تحلّ مكتب المحاماة متاعها موش تاكل الدّنيا و تتسحّر بالآخرة .
المْرَا مواطنة ، لاهي كائن خرافي و لاهي مخلوق فضائي ، و ممارسة المواطنة تخوّللها باش تتقلّد أيّ منصب و تتحاسب على الباهي و الخايب كأيّ مسؤول سياسي ، يكفي أنّا نمّنو بمقدرتها أتوّة نخرجو من عنق الدبُّوزة و ماعادش نولّيوْ مجتمع أعْرج

11 commentaires:

Bachbouch a dit…

يعتك ألف صحّة على هالحديث. أنا بيدئ باش نكنب عليه الموضوع هذا عن قريب

ferrrrr a dit…

يمنع دينك فيهم يا ولادة، اعطيهم على روسهم، راهم مرامدية

taxe a dit…

Salut Andalouse, D'accord avec toi alech lè mais "

أحنا شعملنا ؟ رئيسة الوزراء
الوحيدة إلـِّي كانت عندنا قتلناها و تمشكات قضيّة اغتيالها و كأنّ شيئا لم يكنْ و هوني نحكي على بينازير بُوتـُو

C'est bizarre vous dites le seul premier ministre que nous avions eu ( nous c'est qui? les Pakistanais? ). Nous l'avons tuée? encore une fois nous c'est qui?

anonyme17 a dit…

كانك تحكي علعرب ... بيناذير بوتو ماهيش عربية و كانك تحكي علمسلمين في 1933 في تركيا شدت مرا منصب وزيرة أولى اسمها تانسة شيلر

3amrouch a dit…

تعليق خارج الموضوع
هل تعلمين ان هذه المراة يداها ملاطختان بالدماء؟
كانت عضو في الموساد وتحديد في كيدون.
كيدون لعلمك هي فرقة التنفيذ في المخابرات الاسرائيلية ومن عملياتها اغتيال افراد جماعة سبتمبر الاسود وعلاش نمشيو لبعيد هوما المسوولين وهي معاهم عن اغتيال ابو جهاد في تونس.
العفن مايجيب كان لعفن(اسف للتشبيه) لكن هذيكه لحقيقة المرة
اهذا وقد قيل اعود للتعليق على موضوعك
اولا امريكيا مازلت ماهيش حاضرة لتقبل رئاسة امراة ورضو بان يراسهم اسود على ان تكون امراة وهذا مايفسر خسارة وانسحاب هيلاري ربما في اوروبا الامر مختلف ولكن ليس في امريكيا المحافظة
بالنسبة للوضع التونسي مثلا هاك وحدك قلتها وكلامك يغني عن كل تعليق (نسائنا من سعيدة ساسي الي كانت تكفي همسة منها ان ان ترج الطبقة السياسية التونسية رجا الى السيدة الحالية التي تعزل وتولي على كيفها)
يخدمو في خدمة "صحيحة" ولكن في الكواليس
هذاكه حالنا سيدتي, كل العرب بدون استثناء ,تدار دولنا من غرف النوم وتحكم بنظام اقطاعي رهيب
واعطيني اسم امراة تالقت ووقع حجبها؟
شخصيا لا ارى من يصلح لهذه المهمة غير سهير بالحسين مثلا (تجربة،كارزيم ، ثقافة ومشروعية...)
نسائنا المثقفات والقادرات سيدتي وهنا كثيرات في تونس او غيرها يشغلون اوقاتهم بالتفاهات والصراعات الوهمية مع عدو وهمي
في فرنسا مثلا لم يرضو بسيكولان ورغم ماضيها الكبير وخبرتها (موجودة من ايام ميتران) ورغم ذلك خسرت امام ساركوزي على الرغم من مساوئه وما شعار المعارضين له الا دليل على عدم تقبلهم لفكرة ولاية امراة( كل شيء ولا ساركو
tous sauf sarko

وبالنسبة لبنازير بوتو فافضل ان لا اعلق احسن

WALLADA a dit…

تـاكس

عندك ياسر سؤال "أحنا شكون" يا أخي كانك ماكش لا من العرب لا من المسلمين و لا حتّى من العالم الثالث ، حدّد موقعك و قوللنا أنت منين
أنا شخصيّا ما عنديش أزمة هويّة


المجهول 17

نحكي عالعرب و عالمسلمين و على بلدان العالم الثالث . صحيح في تركيا كان فمّة رئيسة وزراء و لكن هاك وحدك قلتها في 1933 و من وقتها لتوّة آش فمّة ؟ و القضيّة راهي موش في منصب رئاسة الوزراء في حدّ ذاتها و لكن في تجديد الثقة في المرَا كشريك فعلي كي نعطيوها حقائب مهمّة كيما الاقتصاد و التعليم و الخارجيّة ... موش ديما محصورة في وزارة المرأة


عمروش

كونه تاريخ رئيسة الوزراء الإسرائيليّة حافل تاريخ دموي هذاك في مضرّتنا أحنا كعرب موش في مضرّة شعبها و اعطيني مسؤول سياسي واحد اعتلى سدّة الحكم من غير مؤامرات ، و كي تجي تشوف حديثي عليها كان منطلق موش هي موضوعي
و موش صحيح أنّه المرَا المثقفة في بلادنا لاهية كان بالتفاهات ، البارح في الأيّام كنتو متضامنين مع زكيّة الضيفاوي أما آش باش نقلّك ؟ في بلاد تفتقر لحريّة التعبير و حريّة ممارسة أيّ نشاط سياسي ، فين باش تبرز المرَا المثقفة

Anonyme a dit…

يعطيك الصحة


@3amrouch
الجماعة اللي قتلتهم انما قامت بذلك
دفاعا عن وطنها من جماعة ما يحشموش و مطارات و شوارع العالم شاهدة على أعمالهم المشومة

Anonyme a dit…

@Waalada et anonyme17:
تانسو شيللر شدت الحكم في تركيا من 1993 حتى 1996

Tunisofra a dit…

يا ولادة ربي يهديك .. خايف ليليا تقرا التدوينة متاعك، تمشي تعمل عملة موش باهيا ..

HNANI a dit…

@3amrouch
يظهرلي يا عمروش حبيت اتأكّد الفكرة متاع المرا ما تصلحش للحكم بالزوز أمثلة إلّى عطيتهم متاع أمريكا و فرانسا، و هوكا بطريقة ذكية و تحت حس مس
أمّا علاش خسروا الزوز نسا هاذم راك ما جبتش فيها

@ wallada
يا ولّادة راهي الحكاية و ما فيها المنصب السياسي في البلدان المتخلفة راهو بزنس، فلوس، أفاريات، مشاريع... عاد كيفاش باش يخليوا مرا تاخذ هالشيء هذا الكل؟ تهو راجلها ما يخليهاش و يعمل المستحيل باش يا ياخذ البلاصة هو يا يحرّم عليها
حكاية أما نلعب ولّا انحرّم
العقلية يا بنيتي،لا حكاية مقدرة و لاهم يحزنون

taxe a dit…

Ahla Wallada,

Ma 3andich mochkilt hawéya,Ama kima qualikk Anonyme wi 3amrouch il ne faut pas tout mélanger,le prblème c'est dans ton article, tu mets les musulmans, les arabes et le 1/3 monde en simple "Nous" mais je te rappelle que libera, Guinea Bisseau ont eu déjá une présidente femme (1/3 monde, L'Indonesie pays musulman avait une femme comme présidente(pays musulman).