jeudi 18 septembre 2008

اللّــغز الحادي عشر

صحّة شريبتكم
ريتـُو كي دوّرناها شعر شعبي كيفاش ما جاب حَدّ الجواب الصّحيح ؟
هو في الحقيقة ما نلومش عليكم ياسر أما كنتـُو تنجّمو تبربشو و تسألو و لكنّي نلوم على ولاد الجنوب - و نستثني منهم أبو ناظم بالطبيعة- خاطر هو مولى الأفكار شكلا و مضمونا
الحلّ
من مصطلحات المنسج الغزَلْ و هو الخيط و النـَّايِرْ هو ما دخل في النـِّيرَة أيْ خيوط التخبيل و الحَايِفْ هو ما خرج عنها و أفسد النـَّسج
و توّه هاني باش نقدّملكم لغز أسهل شويّة
يقول الشـّاعر
ثمّة ثلاثة يكرهو جَيَّاني ضَوّ القمَرْ و الكلبْ و الشـِّيبَاني
ما المُشترَك بين هذه العناصر الثلاثة يكرهه الشاعر و عْلاشْ ؟

8 commentaires:

HNANI a dit…

صحة شريبتك ،صعيبة يا ولادة، توا بعد شويا انزيد انحاول، بعد مانزيد نشرب شويا قهوة

WALLADA a dit…

هناني

صحّة شريبتك و نشااللّه تحلّت عينيك بالقهوة ، أيا بالشّفا

السّاعة لغز اللّيلة ساهل ياسر

الحلاج الكافي a dit…

المشترك بين الثلاثة ضوء القمر و الكلب و الشيباني و ان الثلاثة يمنعون لقاء الشاعر بحبيبته فضوء القمر يكشف الشاعر ليلا عكس الظلام الدّامس والكلب يكشف قدوم الشاعر للقاء بنباحه و منعه للغريب القادم و هو الشاعر و الشيباني وهو الرجل العجوز "الحزّار" الذي بفضل ضوء القمر و نباح الكلب و قلّة النوم و الأرق الذي يصيب الشيوخ و كثرة ريبة لديهم يمنعون اللقاء ويفسدون مواعيد الشاعر و حبيبته

HNANI a dit…

يظهرلي الحلاج لقاها، أمّا أنا قلت الكلب و الشيباني يعملوا برشا حس و ما يسكتوش و الشاعر يحب الرياض، و القمرة مالقيتلهاش علاقة بيهم على خاطرني مامشيتش في الثنية متاع الحلاج و المقابلات بالسرقة، امشيت في ثنية هاك الشاعر إلّى يحب يشعر و يعمل قصيدة على ضو القميرة و نورها
أيا يزّيني ديمة مانلقاش الحل

Werewolf a dit…

بون يظهرلي الحلاّج لقاها أما ميسالش زيادة الخير ما فيها ندامة...نحاول نعطي اقتراحات مالحيط... ضوء القمر يحجب عليه رؤية النجوم و صوت الكلب ما يخليوش يركز و يكتب الشعر و الشيباني ياسر يكعرر عليه ما يخليوش يركز زادة
:)))

HNANI a dit…

@3amrouch
يظهرلي يا عمروش حبيت اتأكّد الفكرة متاع المرا ما تصلحش للحكم بالزوز أمثلة إلّى عطيتهم متاع أمريكا و فرانسا، و هوكا بطريقة ذكية و تحت حس مس
أمّا علاش خسروا الزوز نسا هاذم راك ما جبتش فيها

@ wallada
يا ولّادة راهي الحكاية و ما فيها المنصب السياسي في البلدان المتخلفة راهو بزنس، فلوس، أفاريات، مشاريع... عاد كيفاش باش يخليوا مرا تاخذ هالشيء هذا الكل؟ تهو راجلها ما يخليهاش و يعمل المستحيل باش يا ياخذ البلاصة هو يا يحرّم عليها
حكاية أما نلعب ولّا انحرّم
العقلية يا بنيتي،لا حكاية مقدرة و لاهم يحزنون

HNANI a dit…

التدعّل موش في بلاصتو راهو متاع التدوينة الأخري
ولّيت امكوخرا

WALLADA a dit…

هناني

ههههههههه ماني قتلك ماعادش تسهر بعد نصف اللّيل ، و إلاّ أعمل لها قهوة أخرى باش تحلّ عينيك ، الحاصيلو جيّاتك عندي الكلّ محلاهم و شوّقتني باش نراك في الدّنيا